cambodia-nation-media.com

ទីភ្នាក់ងារសារព័ត៌មាន Reuters បានឱ្យដឹងថាក្រុមមន្ត្រីអង្គការសហប្រជាជាតិដែលបានចុះទៅដល់តំបន់រងគ្រោះ បានមើលឃើញជនរងគ្រោះកំពុងខ្វះខាតខ្លាំង ដូចជាថ្នាំសង្កូវ ទឹកស្អាត និងស្បៀងអាហារ ជាកត្តាសំខាន់សម្រាប់ជួយសង្គ្រោះប្រជាពលរដ្ឋដែលរងគ្រោះ។ យ៉ាងណាក្រុមមន្រ្តីបានអំពាវនាវបណ្តាប្រទេសអ្នកមានបន្តជួយដល់ប្រទេសមីយ៉ាន់ម៉ា។

ជាមួយគ្នានេះ អ្នកនាំពាក្យរបស់អង្គការសហប្រជាជាតិ លោក Stephane Dujarric បាននិយាយថា ក្រុមមន្ត្រីរបស់អង្គការសហប្រជាជាតិ ត្រូវតែខិតខំយ៉ាងឆាប់រហ័ស ដើម្បីផ្តល់ការសង្គ្រោះមុនរដូវភ្លៀងចូលដល់នាពេលខាងមុខ ដែលនឹងធ្វើឲ្យវិបត្តិដ៏អាក្រក់នេះកាន់តែអាក្រក់ទៅៗ។

បេសកជនពិសេសអង្គការសហប្រជាជាតិ ប្រចាំប្រទេសភូមា អ្នកស្រី Julie Bishop បាននិយាយថា សង្គ្រាមស៊ីវិលនៅភូមា បានបណ្ដាលឱ្យមានជនភៀសខ្លួនជាង ៣លាន ៥សែននាក់។ អ្នកស្រី Julie Bishop ជាជនជាតិអូស្ត្រាលី បានទទូចឱ្យភាគីកំពុងចម្បាំងគ្នានៅភូមា បញ្ឈប់ការប្រយុទ្ធគ្នាជាបន្ទាន់ ដើម្បីឱ្យមានដំណើរការការងារមនុស្សធម៌ និងធានាសុវត្ថិភាពបុគ្គលិកផ្តល់ជំនួយអន្តរជាតិចូលទៅដល់តំបន់រញ្ជួយដី។

សូមបញ្ជាក់ផងដែរថា កាលពីថ្ងៃសុក្រ ទី២៨ ខែមីនា ប្រទេសភូមា និងប្រទេសថៃ នៅតំបន់អាស៊ីអាគ្នេយ៍បានរងការរញ្ជួយដីដ៏ខ្លាំងបំផុតក្នុងកម្លាំង ៧,៧រ៉ិចទ័រ ដោយបានវាយរំលំអគារជាច្រើន ជាពិសេសនៅប្រទេសភូមា តំបន់ចំនួន៣ បានរងគ្រោះខ្លាំងក្នុងតំបន់នៅក្រុងម៉ាន់ដាឡេ តំបន់នៅក្រុងណៃភិដោរ និងតំបន់ទីក្រុងយ៉ាំងហ្គន។ ក្រុមជួយសង្គ្រោះនៃប្រទេសភូមា បានឱ្យដឹងថា ចំនួនអ្នកស្លាប់ដោយសារគ្រោះរញ្ជួយដី បានបន្តកើន ៣០១៣នាក់ ខណៈតួលេខនេះអាចនឹងបន្តកើនដល់លើស លើសនេះបន្ថែមទៀត។

ជាមួយគ្នានេះដែរ អ្នករងរបួសក៏បានបន្តកើនដល់ចំនួន ៤៦៣៩នាក់ ចំណែកឯ ៣៧៣នាក់ នៅបន្តបាត់ខ្លួន។ គ្រោះរញ្ជួយដីនៅទីក្រុងបាងកក ដែលកម្រិតធ្ងន់ ៧,៧រ៉ិចទ័រ ដោយបង្កការរំញ័រដល់តំបន់ជាច្រើន ក្នុងនោះរួមមានទាំងទីក្រុងបាងកក និងភាគខាងជើងប្រទេសថៃ។ គ្រោះរញ្ជួយដីកម្រិត ៧,៧រ៉ិចទ័រ បានវាយប្រហារភូមា និងប្រទេសថៃ កាលពីថ្ងៃសុក្រ ទី២៨ ខែមីនា គឺជាគ្រោះរញ្ជួយដីធំបំផុតមិនធ្លាប់មានក្នុងរយៈពេលជាង ១សតវត្សរ៍នៅប្រទេសអាស៊ានពីរនេះ។