ក្រសួងការពារជាតិរុស្ស៊ីបានចេញសេចក្ដីប្រកាសថា កងកម្លាំងរបស់រុស្ស៊ីបានបាញ់ទម្លាក់យន្តហោះគ្មានមនុស្សបើករបស់អ៊ុយក្រែនចំនួន 337 គ្រឿងដែលបានបង្ហោះមកលើប្រទេសរុស្ស៊ី ដែលក្នុងនោះ 91 គ្រឿងបានកំណត់គោលដៅវាយប្រហារលើទីក្រុងមូស្គូ នេះបើយោងតាមទីភ្នាក់ងារសារព័ត៌មានរដ្ឋ TASS ។ សារព័ត៌មានTASS បានឱ្យដឹងទៀតថា កំទេចកំទីនៃដ្រូនទាំងនោះក៏បានធ្វើឱ្យខូចខាតអគារជាច្រើនផងដែរ នេះបើតាមលោកអភិបាលក្រុងម៉ូស្គូ Sergei Sobyanin បានបង្ហោះនៅលើបណ្ដាញសង្គម Telegram ។ ការវាយប្រហារពេញមួយយប់មកលើប្រទេសរុស្ស៊ីនេះបានបង្ខំឲ្យអាកាសយានដ្ឋានក្រុងម៉ូស្គូចំនួនពីរត្រូវបិទទ្វារជាបន្ទាន់ ហើយអាកាសយានដ្ឋានចំនួនពីរផ្សេងទៀតដែលស្ថិតនៅភាគខាងកើតទីក្រុងក៏ផ្អាកដំណើរការបណ្ដោះអាសន្នផងដែរ។ តាមការ​បញ្ជាក់ ការវាយប្រហារ​តាម​អាកាស​នេះគឺជាការប្រហារ​ដ៏​ធំ​បំផុត​មួយ​លើ​រុស្ស៊ី ចាប់តាំងពី​ការ​ឈ្លានពាន​របស់​ខ្លួន​មក​លើ​អ៊ុយ​ក្រែ​ន​។