នាយករដ្ឋមន្ត្រីកាណាដា លោក ចាស្ទីន ទ្រូដូ បានប្រកាសថា កាណាដានឹងឆ្លើយតបយ៉ាងខ្លាំងក្លា និងសមាមាត្រទៅវិញ ប្រសិនបើអាម៉េរិកហ៊ានដាក់ពន្ធលើការនាំចូលទំនិញរបស់កាណាដាក្នុងសប្តាហ៍នេះ។​ ពន្ធ​ដែល​ប្រធានាធិបតី​អាម៉េរិក​លោក ដូណាល់ ត្រាំ គ្រោង​នឹង​ដាក់​លើទំនិញកាណាថា គឺដោយសារតែ​​វិបត្តិនៃការរត់ពន្ធថ្នាំ​យ៉ាងគំហុកពីប្រទេសនេះ។ ទោះជាយ៉ាងណា លោក ទ្រូដូ បានបញ្ជាក់ថា តិចជាង១ភាគរយនៃការរត់ពន្ធថ្នាំចូលទឹកដីអាម៉េរិកមានប្រភពមកពីកាណាដា ប៉ុន្តែរដ្ឋាភិបាលកាណាដានៅតែចាត់វិធានការយ៉ាងសកម្មដើម្បីកាត់បន្ថយចំនួននេះ។ «ការពិតគឺច្បាស់ណាស់ថាកាណាដាមិនមែនជាបញ្ហារបស់ថ្នាំ fentanyl ខុសច្បាប់ចូលមកអាម៉េរិកទេ។ យើងមានតិចជាង ១ភាគរយ នៅពេលដែលយើងចាប់ផ្តើមនិយាយអំពីរឿងនេះជាច្រើនខែមុន ហើយវាទាបជាងពេលនេះ។ យើងដឹងថារដ្ឋបាលអាម៉េរិកនឹងមានជម្រើសមួយចំនួនលើពន្ធ។ យើងនឹងធ្វើអ្វីគ្រប់យ៉ាង យើងនឹងធ្វើការដើម្បីធ្វើឱ្យប្រាកដថាមិនមានពន្ធគយនៅថ្ងៃទី៤ ខែមីនា»។ លោក ទ្រូដូ បានបញ្ជាក់បែបនេះ។ រដ្ឋមន្ត្រីពាណិជ្ជកម្មអាម៉េរិកលោក Howard Lutnick បានថ្លែងនៅថ្ងៃទី២ ខែមីនាថា ពន្ធដែលអាម៉េរិកដាក់លើកាណាដា និងម៉ិកស៊ិកនឹងចូលជាធរមាននៅថ្ងៃទី៤ ខែមីនា ទោះបីជាមន្ត្រីរូបនេះបានបន្ថែមថា លោកប្រធានាធិបតី ដូណាល់ ត្រាំ មិនទាន់បញ្ជាក់ថាតើលោកនឹងរក្សាពន្ធ ២៥ភាគរយ ដែលបានគ្រោងទុកពីដើមឬយ៉ាងណា។ នាយករដ្ឋមន្ត្រីកាណាដា ចាស្ទីន ទ្រូដូ បានគូសបញ្ជាក់ម្តងហើយម្តងទៀតថា កាណាដាមិនចង់បានសង្រ្គាមពាណិជ្ជកម្មជាមួយអាម៉េរិកទេ ប៉ុន្តែរដ្ឋាភិបាលរបស់លោកនឹងធ្វើអ្វីគ្រប់យ៉ាងដើម្បីការពារផលប្រយោជន៍ជាតិ៕