នៅថ្ងៃទី០៧ ខែមេសា ឆ្នាំ២០២៦ ប្រធានាធិបតីសហរដ្ឋអាមេរិក លោក ដូណាល់ ត្រាំ បានប្រកាសពន្យារពេលការវាយប្រហារដ៏បំផ្លិចបំផ្លាញលើប្រទេសអ៊ីរ៉ង់ ដែលដំបូងឡើយត្រូវបានគ្រោងធ្វើឡើងនៅយប់នេះ ។ ការសម្រេចចិត្តផ្អាកការទម្លាក់គ្រាប់បែករយៈពេល ពីរសប្តាហ៍ នេះ ធ្វើឡើងតាមការស្នើសុំរបស់នាយករដ្ឋមន្ត្រី និងអគ្គមេបញ្ជាការកងទ័ពនៃប្រទេសប៉ាគីស្ថាន យោងតាមប្រភពព័ត៌មាន លក្ខខណ្ឌសំខាន់នៃការផ្អាកនេះគឺអាស្រ័យលើការព្រមព្រៀងរបស់អ៊ីរ៉ង់ក្នុងការបើកផ្លូវទឹកស្ត្រេតហូម៉ូស (Strait of Hormuz) ឱ្យបានពេញលេញ និងមានសុវត្ថិភាពជាបន្ទាន់ ។ លោក ត្រាំ បានបញ្ជាក់ថា ការផ្អាកនេះនឹងក្លាយជាការឈប់បាញ់គ្នាទ្វេភាគី ខណៈដែលគោលដៅយោធាភាគច្រើនត្រូវបានសម្រេចរួចរាល់ហើយ បច្ចុប្បន្ន ភាគីទាំងពីរកំពុងឈានទៅរកកិច្ចព្រមព្រៀងសន្តិភាពរយៈពេលវែងនៅមជ្ឈិមបូព៌ា ដោយផ្អែកលើសំណើ ១០ ចំណុចដែលទទួលបានពីអ៊ីរ៉ង់ ។ លោកប្រធានាធិបតីបានបន្ថែមថា ចំណុចជម្លោះស្ទើរតែទាំងអស់ត្រូវបានព្រមព្រៀងគ្នាហើយ ហើយរយៈពេលពីរសប្តាហ៍នេះនឹងត្រូវប្រើប្រាស់ដើម្បីបញ្ចប់ និងអនុវត្តកិច្ចព្រមព្រៀងជាផ្លូវការ