ប្រធានាធិបតី ដូណាល់ ត្រាំ បាន​ប្រកាស​​ មិនច្រានចោលការបញ្ជូនកងទ័ពជើងគោកអាមេរិកទៅកាន់ប្រទេសអ៊ីរ៉ង់ឡើយ ដោយលោកបានបញ្ជាក់ ក្នុងបទសម្ភាសន៍​មួយ​ ថាលោកនឹងពិចារណាលើចំណាត់ការនេះ ប្រសិនបើចាំបាច់ ដើម្បីសម្រេចគោលដៅយោធា។ ថ្លែងទៅកាន់សារព័ត៌មាន New York Post លោកត្រាំ​បាន​និយាយ​​ថា លោកមិនមានការស្ទាក់ស្ទើរក្នុងការប្រើប្រាស់កម្លាំងទ័ពជើងគោកដូចប្រធានាធិបតីមុនៗនោះទេ ទោះបីជាលោកយល់ថាវា «ប្រហែលជា» មិនចាំបាច់ក៏ដោយ។ លោកបាន​សង្កត់​ធ្ងន់​​ថា គោលដៅធំបំផុតគឺការកម្ទេចសមត្ថភាពមីស៊ីល បំផ្លាញកងទ័ពជើងទឹកអ៊ីរ៉ង់​ឲ្យ​ខ្ទេចខ្ទី បញ្ឈប់មហិច្ឆតានុយក្លេអ៊ែរ និងផ្តាច់ការផ្តល់មូលនិធិដល់កងទ័ពភេរវករ​នៅក្រៅប្រទេស។ ចំណែក​ឯ​រដ្ឋមន្ត្រី​ការពារជាតិ លោក Hegseth និងឧត្តមសេនីយ៍ Dan Caine បានសង្កត់ធ្ងន់ថា បេសកកម្មកម្ទេចមហិច្ឆតានុយក្លេអ៊ែរ និងហេដ្ឋារចនាសម្ព័ន្ធយោធាអ៊ីរ៉ង់ គឺជា «ការងារដ៏លំបាក និងស្មុគស្មាញ» ដែលមិនអាចកំណត់ពេលវេលាច្បាស់លាស់បានឡើយ៕