ចូលឆ្នាំ២០២៦ហើយ ប៉ុន្តែទីក្រុងបាងកកអត់ធូរស្បើយពីខ្យល់ពុលទេ ពោលគឺកំហាប់ភាគល្អិត PM2.5 នៅតែបន្តគ្របដណ្តប់រាជធានីប្រទេសថៃ ដោយកន្លែងខ្លះឈានដល់កម្រិត៧០.៣មីក្រូក្រាមក្នុងមួយម៉ែត្រគូបនៃខ្យល់ឯណោះ។ តាមការផ្សាយរបស់ The Nation ដោយដកស្រង់ទិន្នន័យពីរដ្ឋបាលក្រុងបាងកក, គិតត្រឹមថ្ងៃព្រហស្បតិ៍ទី១ខែមករាឆ្នាំ២០២៦ ខ័ណ្ឌ Chatuchak ត្រូវគ្របដណ្តប់ដោយ PM2.5 កម្រិត៧០.៣មីក្រូក្រាមក្នុងមួយម៉ែត្រគូបនៃខ្យល់។ ខ័ណ្ឌនេះជាកន្លែងរងការវាយប្រហារដោយខ្យល់ពុលខ្ពស់ជាងគេបំផុតក្នុងទីក្រុងបាងកក បន្ទាប់មកគឺ Don Mueang ៦៨.៧មីក្រូក្រាមក្នុងមួយម៉ែត្រគូប ខណៈ Lat Krabang និង Prawet ៦៨.២មីក្រូក្រាមក្នុងមួយម៉ែត្រគូប ដូចគ្នា។ កម្រិតដ៏អាក្រក់នេះ បានបង្កជាគ្រោះថ្នាក់ដល់សុខភាពពលរដ្ឋថៃ ជាពិសេសមនុស្សចាស់ជរានិងអ្នកមានជំងឺរ៉ាំរ៉ៃដូចជាជំងឺសួតនិងបេះដូង។ ទន្ទឹមនោះ រដ្ឋបាលក្រុងព្រមានថា ក្រុមមនុស្សដែលមានហានិភ័យ គួរតែចៀសវាងសកម្មភាពក្រៅផ្ទះ៕