ចាប់ពីថ្ងៃទី៤ ដល់ថ្ងៃទី១១ ខែកម្ភៈ ឆ្នាំ២០២៥ សហភាពសហព័ន្ធយុវជនកម្ពុជា (ស.ស.យ.ក) បានដឹកនាំប្រតិភូសិល្បករខ្មែរ៣៦នាក់ ដើម្បីចូលរួមសម្ដែងក្នុងព្រឹត្តិការណ៍ក្បួនដង្ហែឈីងហ្គេ (Chingay Parade) នៅសាធារណរដ្ឋសិង្ហបុរី តបតាមការអញ្ជើញរបស់សមាគមន៍ប្រជាជនសិង្ហបុរី ។ ឈីងហ្គេ ជាក្បួនព្យុហយាត្រាសិល្បៈសម្តែងដ៏ធំមួយលំដាប់អន្តរជាតិ ដែលផ្ដល់ឱកាសដល់បណ្ដាប្រទេសផ្សេងៗបានចែករំលែកបទពិសោធ បង្ហាញពីមរតកវប្បធម៌ ផ្សារភ្ជាប់បេតិកភណ្ឌ វប្បធម៌តំណាងប្រទេសនីមួយៗ និងជាពិសេសបង្ហាញពីភាពចម្រុះនៃការចូលរួមរបស់សហគមន៍ក្នុងតំបន់នានា។ព្រឹត្តិការណ៍ក្បួនព្យុហយាត្រាសិល្បៈបានផ្តួចផ្តើមដោយអតីតនាយករដ្ឋមន្ត្រី លី ក្វាន់យូ ក្នុងគោលបំណងបង្ហាញពីភាពអស្ចារ្យ ភាពស្រស់បំព្រង និងភាពសម្បូរបែបនៃវប្បធម៌ចម្រុះជាតិសាសន៍។ ក្បួនព្យុហយាត្រានេះនឹងមានការចូលរួមសម្តែងដោយក្រុមសិល្បៈជាតិនិងរួមបញ្ចូលជាមួយបណ្តាសិល្បករមកពីជុំវិញពិភពលោករួមគ្នាបង្ហាញពីសិល្បៈវប្បធម៌នៃជាតិសាសន៍រៀងៗខ្លួន។ ព្រឹត្តិការណ៍ក្បួនព្យុហយាត្រាសិល្បៈឈីងហ្គេឆ្នាំ២០២៥ នឹងប្រារព្ធធ្វើរយៈពេលពីរថ្ងៃ គឺចាប់ពីថ្ងៃទី៧ ដល់ថ្ងៃទី៨ ខែកុម្ភៈ ឆ្នាំ២០២៥ នៅសាធារណរដ្ឋសិង្ហបុរី ក្រោមប្រធានបទ “JOY” ដែលប្រធានបទនេះរៀបចំឡើងដើម្បីបង្ហាញពីសុភមង្គល ភាពកក់ក្តៅ បង្កើតជាពិធីជួបជុំមួយប្រកបដោយស្នាមញញឹម និងភាពរីករាយតាមរយៈម្ហូបអាហារ។ នៅឆ្នាំនេះ កម្ពុជានឹងនាំយកទិដ្ឋភាពសិល្បៈនិងវប្បធម៌ចម្រុះបែបថ្មីមួយបន្ថែមទៀត ដែលក្រោមចំណងជើងថា «ជីវិត» ដើម្បីបង្ហាញពីភាពអស្ចារ្យនិងការវិវត្តនៃសិល្បៈកម្ពុជាក្នុងព្រឹត្តិការណ៍ក្បួនដង្ហែឈីងហ្គេឆ្នាំ២០២៥។