ខេត្តព្រៃវែង ៖ ថ្ងៃទី២០ ខែវិច្ឆិកា ឆ្នាំ២០២៥ អាជ្ញាធរជាតិប្រយុទ្ធប្រឆាំងគ្រឿងញៀន ក្រសួងអធិការកិច្ច និងរដ្ឋបាលខេត្តព្រៃវែងរួមគ្នាផ្សព្វផ្សាយច្បាប់ស្តីពីការត្រួតពិនិត្យគ្រឿងញៀន និងជំរុញប្រើប្រាស់ App NoDrug ដល់មន្រ្តីរាជការ កងកម្លាំង អាជ្ញាធរមូលដ្ឋាន សិស្សានុសិស្សនៅស្រុកកញ្រ្ចៀច ខេត្តព្រៃវែង។ ទាំងលោក សុទ្ធ សោភ័ណ អភិបាលស្រុក និងលោកជំទាវ សេង ទៀង អភិបាលរងខេត្តព្រៃវែង សុទ្ធតែបានថ្លែងដោយបានលើកឡើងពីការរីកចម្រើន សន្តិសុខ សណ្តាប់ធ្នាប់ និងការអនុវត្តគោលនយោបាយភូមិ ឃុំ សង្កាត់ មានសុវត្ថិភាពពិសេសបញ្ហាគ្រឿងញៀន។ ក្នុងនាមឯកឧត្តម នាយឧត្តមសេនីយ៍ មាស វិរិទ្ធ អគ្គលេខាធិការនៃអាជ្ញាធរជាតិប្រយុទ្ធប្រឆាំងគ្រឿងញៀន ក្នុងឱកាសនោះ ឧត្តមសេនីយ៍ឯក លឹម តុងហួត ប្រធាននាយកដ្ឋានផ្សព្វផ្សាយ អប់រំ និងទំនាក់ទំនងសាធារណៈបានថ្លែងអំណរគុណដល់ក្រសួងក៏ដូចជាអាជ្ញាធរគ្រប់លំដាប់ថ្នាក់ដែលបានចូលរួមប្រយុទ្ធប្រឆាំងគ្រឿងញៀននាំមកនូវសុខសុវត្ថិភាពជូនប្រជាពលរដ្ឋហើយលោកបានចែករំលែកនូវចំណេះដឹងពាក់ព័ន្ធនឹងច្បាប់ស្ដីពីការត្រួតពិនិត្យគ្រឿងញៀនក៏ដូចជាការងារប្រយុទ្ធប្រឆាំងគ្រឿងញៀនតាមប្រព័ន្ធបច្ចេកវិទ្យា App NoDrug ។ ក្នុងនាមឯកឧត្តម សុខ សូកេន រដ្ឋមន្ត្រីក្រសួងអធិការកិច្ច ក្នុងឱកាសនោះដែរ លោកជំទាវ វី ស្រីពៅ រដ្ឋលេខាធិការក្រសួងអធិការកិច្ចបានថ្លែង ឱ្យបានលើកឡើងពីសារៈសំខាន់នៃការផ្សព្វផ្សាយច្បាប់ស្ដីពីការត្រួតពិនិត្យគ្រឿងញៀននិងបានសំណូមពរឱ្យបន្តអនុវត្តច្បាប់និងផ្សព្វផ្សាយបន្តដល់ប្រជាពលរដ្ឋទាំងអស់ឱ្យចូលរួមគោរពច្បាប់គ្រប់គ្នាដើម្បីសុខសុវត្ថិភាព គ្មានហិង្សា និងការរីកចម្រើនរបស់ប្រទេសជាតិ។