បរទេស៖ ប្រទេសវៀតណាមបានប្រកាសផែនការជម្លៀសប្រជាជនជាងកន្លះលាននាក់ និងបានបញ្ជាឱ្យទូកមិនត្រូវចេញទៅសមុទ្រ ខណៈដែលទីក្រុង Sanya ភាគខាងត្បូងប្រទេសចិន បានបិទអាជីវកម្ម និងការដឹកជញ្ជូនសាធារណៈ កាលពីថ្ងៃអាទិត្យ ខណៈដែលប្រទេសទាំងពីរបានត្រៀមខ្លួនសម្រាប់ព្យុះទីហ្វុង Kajiki ។

យោងតាមសារព័ត៌មាន រ៉យទ័រ ចេញផ្សាយកាលពីថ្ងៃទី២៤ ខែសីហា ឆ្នាំ២០២៥ បានឱ្យដឹងថា មជ្ឈមណ្ឌលឧតុនិយមជាតិរបស់ប្រទេសចិនបាននិយាយថា ព្យុះនេះត្រូវបានគេព្យាករណ៍ថា នឹង "ឆ្លងកាត់" ឆ្នេរសមុទ្រភាគខាងត្បូងនៃខេត្តកោះ Hainan របស់ប្រទេសចិន ចាប់ពីល្ងាចថ្ងៃអាទិត្យ មុនពេលធ្វើដំណើរទៅកាន់ប្រទេសវៀតណាម។

គិតត្រឹមម៉ោង 0900 GMT ព្យុះនេះបានកើនឡើងកម្លាំង ដោយមានខ្យល់បក់ឡើងដល់ ១៦៦ គីឡូម៉ែត្រក្នុងមួយម៉ោង ,នេះបើយោងតាមទីភ្នាក់ងារព្យាករណ៍អាកាសធាតុជាតិរបស់ប្រទេសវៀតណាម។

ចំណែកអ្នកព្យាករណ៍អាកាសធាតុរបស់ប្រទេសចិនបាននិយាយថា ព្យុះទំនងជានឹងពង្រឹងកម្លាំងបន្ថែមទៀតជាមួយនឹងល្បឿនខ្យល់ខ្លាំងរហូតដល់ ១៨០ គីឡូម៉ែត្រក្នុងមួយម៉ោង។

ប្រព័ន្ធផ្សព្វផ្សាយរដ្ឋបានរាយការណ៍ថា អាជ្ញាធរក្នុងប្រទេសវៀតណាមគ្រោងនឹងជម្លៀសមនុស្សជាង ៥៨៩.០០០ នាក់ពីខេត្តភាគកណ្តាលនៃខេត្ត Thanh Hoa, Quang Tri, Hue និង Danang ជាកន្លែងដែលព្យុះទីហ្វុងត្រូវបានគេព្យាករណ៍ថានឹងបោកបក់នៅព្រឹកថ្ងៃចន្ទ។

កាសែត Tien Phong បានរាយការណ៍ថា ខេត្តឆ្នេរចំនួនប្រាំពីរក្នុងប្រទេសវៀតណាមបានហាមឃាត់ទូកមិនឱ្យចាកចេញពីច្រាំងកាលពីព្រឹកថ្ងៃអាទិត្យ។ ចំណែកក្រុមហ៊ុនអាកាសចរណ៍វៀតណាមបានលុបចោលជើងហោះហើរយ៉ាងហោចណាស់ 22 ជើងទៅនិងមកពីទីក្រុងកណ្តាលកាលពីថ្ងៃអាទិត្យនិងថ្ងៃចន្ទ។ ក្រុមហ៊ុនអាកាសចរណ៍ Vietjet បាននិយាយថា ខ្លួនកំពុងលុបចោល ឬពន្យារពេលជើងហោះហើរ ប៉ុន្តែមិនបានផ្តល់ព័ត៌មានលម្អិតនោះទេ៕