ក្រសួងមហាផ្ទៃ បន្តហាមឃាត់ការបង្ហោះយន្តហោះដ្រូន ក្នុងខេត្តចំនួន៩ ចាប់ពី ថ្ងៃទី ២០ ខែសីហា តទៅ
ក្រសួងមហាផ្ទៃបានប្រកាសបន្តការហាមឃាត់ការបង្ហោះ អាកាសយានគ្មានមនុស្សបើក (ដ្រូន) នៅក្នុងភូមិសាស្ត្រខេត្តចំនួន ៩ ដែលមានព្រំប្រទល់ជាប់ប្រទេសថៃ។
ការបន្តហាមឃាត់ការបង្ហោះយន្តហោះដ្រូននេះមានប្រសិទ្ធភាពចាប់ពី ថ្ងៃទី ២០ ខែសីហា ឆ្នាំ ២០២៥ តទៅ រហូតដល់មានការណែនាំថ្មី។
ខេត្តទាំង ៩ ដែលស្ថិតក្រោមការហាមឃាត់នេះ រួមមាន៖ ១. ខេត្តឧត្តរមានជ័យ ២. ខេត្តព្រះវិហារ ៣. ខេត្តបន្ទាយមានជ័យ ៤. ខេត្តបាត់ដំបង ៥. ខេត្តប៉ៃលិន ៦. ខេត្តពោធិ៍សាត់ ៧. ខេត្តកោះកុង ៨. ខេត្តសៀមរាប ៩. ខេត្តកំពង់ធំ។
ការបន្តហាមឃាត់នេះ ធ្វើឡើងបន្ទាប់ពីក្រសួងមហាផ្ទៃបានពិនិត្យឃើញរបាយការណ៍ប្រចាំថ្ងៃរបស់រដ្ឋបាលខេត្តទាំង ៩ ថាភាគីថៃនៅតែបន្តបង្ហោះដ្រូននិងសត្វព្រាបបំពាក់ GPS សម្រាប់ស៊ើបការណ៍ចូលមកក្នុងដែនអធិបតេយ្យរបស់កម្ពុជាជារៀងរាល់ថ្ងៃ។ ក្រសួងបានចាត់វិធានការនេះឡើងដើម្បីពង្រឹងការគ្រប់គ្រង និងធានាការពារសន្តិសុខ សណ្ដាប់ធ្នាប់សាធារណៈ និងសុវត្ថិភាពសង្គមនៃព្រះរាជាណាចក្រកម្ពុជា៕
អត្ថបទដោយ៖ cambodia-nation-media
