ឯកឧត្តម កាន់ ផារិទ្ធ រដ្ឋលេខាធិការក្រសួងការបរទេស និងសហប្រតិបត្តិការអន្តរជាតិ តំណាងដ៏ខ្ពង់ខ្ពស់របស់

ឯកឧត្តមឧបនាយករដ្ឋមន្រ្តី ប្រាក់ សុខុន រដ្ឋមន្រ្តីការបរទេស និងសហប្រតិបត្តិការអន្តរជាតិ បានទទួលជំនួបសម្ដែងការគួរសម និងជម្រាបលារបស់លោកស្រី ឃ្លែរ ខូណាន់ (Claire Conan) តំណាង និងជានាយិកាប្រចាំកម្ពុជា នៃអង្គការកម្មវិធីស្បៀងអាហារពិភពលោក (World Food Programme - WFP) ដែលបញ្ចប់បេសកកម្មប្រាំឆ្នាំរបស់លោកស្រីនៅកម្ពុជា។

ឯកឧត្តម កាន់ ផារិទ្ធ បានវាយតម្លៃខ្ពស់ចំពោះ លោកស្រី ឃ្លែរ ដែលបានបំពេញបេសកកម្មរយៈពេល ៥ ឆ្នាំ ប្រកបដោយជោគជ័យ និងបានកោតសរសើរចំពោះការរួមចំណែកយ៉ាងសំខាន់របស់ WFP ក្នុងការលើកកម្ពស់កិច្ចគាំពារសង្គម ពង្រឹងប្រព័ន្ធចំណីអាហារ និងការពង្រឹងសមត្ថភាពការដោះស្រាយគ្រោះមហន្តរាយនៅកម្ពុជា។

លោកស្រី ឃ្លែរ បានសម្តែងនូវអំណរគុណយ៉ាងជ្រាលជ្រៅចំពោះកិច្ចសហការរៀងរហូតមករបស់ក្រសួងការបរទេស និងសហប្រតិបត្តិការអន្តរជាតិ ជាមួយ WFP និងការផ្តល់នូវការគាំទ្រយ៉ាងរឹងមាំចំពោះអាណត្តិបេសកកម្មរបស់លោកស្រី។