cambodia-nation-media.com

ខេត្តកំពង់ធំ៖ ឯកឧត្តម ដៀប ពីរី ប្រធានក្រុមប្រឹក្សាខេត្ត បានវាយតម្លៃខ្ពស់ និងលើកសរសើរចំពោះការដឹកនាំរបស់ឯកឧត្តម នួន ផារ័ត្ន អភិបាលខេត្តកំពង់ធំ លើការអភិវឌ្ឈន៍ហេដ្ឋារចនាសម្ព័ន្ធ ពិសេសការតុបតែងលម្អរតាមដងផ្លូវត្រៀមកម្មវិធីសង្ក្រាន្តអបអរសាទរបុណ្យចូលឆ្នាំថ្មីប្រពៃណីជាតិខ្មែរ។ ឯកឧត្តម ដៀប ពីរី បានមានប្រសាសន៍ដូច្នេះក្នុងកិច្ចប្រជុំសាមញ្ញលើកទី១១ របស់ក្រុមប្រឹក្សាខេត្តកំពង់ធំ អាណត្តិទី៤ នាព្រឹកថ្ងៃទី០៨ ខែមេសា ឆ្នាំ២០២៥ នៅសាលប្រជុំសាលាខេត្តកំពង់ធំ។

ឯកឧត្តមប្រធានក្រុមប្រឹក្សាខេត្តសង្កត់ធ្ងន់ថា ខេត្តកំពង់ធំមានការរីកចម្រើនជាបណ្ដើរៗ ក្រោមការដឹកនាំរបស់ឯកឧត្តម នួន ផារ័ត្ន អភិបាលខេត្តកំពង់ធំ មានការអភិវឌ្ឍមានសោភ័ណភាពស្រស់ស្អាត មានការតុបតែងនៅតាមដងស្ទឹងសែន មន្ទីរអង្គភាព តាមក្រុង/ស្រុក និងទីវត្តអារាម នាឱកាសបុណ្យចូលឆ្នាំថ្មីប្រពៃណីជាតិខាងមុខនេះ ដើម្បីទាក់ទាញភ្ញៀវជាតិ អន្តរជាតិមកទស្សនាកម្សាន្ត ព្រមទាំងមានរក្សាសន្តិសុខសណ្តាប់ធ្នាប់សាធារណៈរបស់កងកម្លាំងទាំង៣ ជូនបងប្អូនប្រជាពលរដ្ឋមកទស្សនាកម្សាន្តទាំងពេលយប់ និងពេលថ្ងៃនៅក្នុងខេត្តកំពង់ធំមានភាពសប្បាយរីករាយ។

ឯកឧត្តម ដៀប ពិរី ក៏បានអំពាវនាវដល់បងប្អូនប្រជាពលរដ្ឋ និងភ្ញៀវទេសចរណ៍ទាំងអស់ចូលរួមថែរក្សា និងទុកដាក់សំរាមឱ្យមានសណ្ដាប់ធ្នាប់ល្អ ចៀសវាងកុំចោលសំរាមផ្ដេសផ្ដាស ធ្វើឱ្យប៉ះពាល់ដល់បរិស្ថាន។ ជាមួយគ្នានោះដែរឯកឧត្តម ញឹក បានខេង អភិបាលរងខេត្តកំពង់ធំ តំណាងឯកឧត្តម នួន ផារ័តន្ន អភិបាលខេត្តកំពង់ធំ បានថ្លែងនៅក្នុងកិច្ចប្រជុំសាមញ្ញលើកទី១១ របស់ក្រុមប្រឹក្សាខេត្ត អាណត្តិទី៤ ថាក្រុមការងារបានយកចិត្តទុកដាក់ទៅលើរបាយការណ៍ ស្ដីពីការអនុវត្តការងាររដ្ឋបាលខេត្តប្រចាំខែមីនា ឆ្នាំ២០២៥ មានភាពច្បាស់លាស់ត្រឹមត្រូវ នឹងត្រូវអនុវត្តបន្តទៀតនៅខែមេសា ឱ្យមានលក្ខណៈច្បាស់លាស់។ សម្រាប់សង្ក្រាន្តខេត្តកំពង់ធំឆ្នាំ២០២៥ នាពេលខាងមុខនេះ សូមឱ្យមន្ទីរអង្គភាពក្រុងស្រុកទាំងអស់ ចូលរួមផ្សព្វផ្សាយបន្ថែមទៀត សហការគ្នាមកកំសាន្តសប្បាយឱ្យបានច្រើនកុះករ ដើម្បីលើកស្ទួយនៅវប្បធម៌ប្រពៃណីជាតិខ្មែរ៕