អនុស្សរណ:ខាងលើនេះ ត្រូវបានចុះហត្តលេខា ជាផ្លូវការ នៅព្រឹកថ្ងៃទី១ ខែមេសា ឆ្នាំ២០២៥ នៅករិយាល័យកណ្តាលធនាគារអេស៊ីលីដា ភីអិលស៊ី ក្នុងរាជធានីភ្នំពេញ ដោយលោកស្រី សុខ សោភា គណៈប្រធាន​នាយិកា​ប្រតិបត្តិ​ ប្រតិបត្តិការ ធនាគារ អេស៊ីលីដា និងលោកស្រី Dinah Jogia Kumar អគ្គនាយកក្រុមហ៊ុន តូតាល់ អេនើជី ម៉ាឃីធីង (ខេមបូឌា) ឯ.ក។ សូមជំរាបថា ធនាគារ អេស៊ីលីដា ភីអិលស៊ី  ជាធនាគារពាណិជ្ជទីមួយ ដែលបានបោះផ្សាយ មូលបត្រជាសាធារណៈនៅកម្ពុជា ខណះក្រុមហ៊ុនតូតាល់ អេនើជី  ម៉ាឃីធីង (ខេមបូឌា) ឯ.ក ជាក្រុមហ៊ុនថាមពលដ៏ធំមួយ ផលិតនិងផ្គត់ផ្គង់​ថាមពល​នលើសកលលោក។ លោកស្រី សុខ សោភា គណៈប្រធាន​នាយិកា​ប្រតិបត្តិ​ ប្រតិបត្តិការ ធនាគារ អេស៊ីលីដា ភីអិលស៊ី  បានថ្កែងថា ការចុះហត្ថលេខា លើអនុស្សរណៈ នៃការយោគយល់គ្នានេះ មិនមែនជាលើកទី១នោះទេ  កន្លងមកធនាគារអេស៊ីលីដា និងក្រុមហ៊ុនតូតាល់ ក៍ធ្លាប់បានចុះកិច្ចព្រមព្រៀង និងអនុស្សរណៈនៃការយោគ យល់គ្នា មួយចំនួន ជាមួយគ្នា កាលពីឆ្នាំ២០២១។ លោកស្រីថា ស្ថាប័នទាំំងពីរជាដៃគូសហការដ៏ល្អ ក្នុងការផ្តល់សេវាកម្មឲ្យគ្នាទៅវិញទៅមក ជាមួយនឹងសេវាកម្មហិរញ្ញវត្ថុ យ៉ាងសម្បូរបែប ដូចជា ការ​ទូទាត់​ តាមបែប​ឌីជីថល ម៉ាស៊ីន POS និងការបញ្ចូលទឹកប្រាក់ ទៅក្នុងប័ណ្ណសមាជិក របស់ក្រុមហ៊ុនតូតាល់ ព្រមទាំងការទូទាត់ វិក័យបត្ររបស់​ស្ថានីយប្រេងឥន្ទន:តូតាល់ លក់ដុំ និង​លក់រាយ​ទាំងអស់ ​នៅតាម​បញ្ជរធនាគារ អេស៊ីលីដា ការទូទាត់ប្រាក់​ តាមរយៈ​អេស៊ី ស៊ូភើអេប និង​ការទូទាត់ប្រាក់​តាមរយៈ​ អេស៊ីលីដា អ៊ីនធើណិត ប្រកប​ដោយទំនុកចិត្ត ​សុវត្ថិភាព និង​​ប្រសិទ្ធភាពខ្ពស់។ ជាមួយគ្នានេះដែរ ធនាគារ អេស៊ីលីដា​ ក៏បានប្រើប្រាស់ ផលិតផល និងសេវាកម្មរបស់ក្រុមហ៊ុនតូតាល់ ដូចជា ការចាក់ប្រេងឥន្ធនៈ សេវាជួសជុល និងថែទាំរថយន្តជាដើម។​ បើតាមលោកស្រី សុខ សោភា   ដើម្បីពង្រឹង និងជំរុញការអនុវត្តកិច្ចព្រមព្រៀង និងអនុស្សរណៈ នៃការយោគយល់គ្នាកន្លងមក ឲ្យកាន់តែមានប្រសិទ្ធភាព និងផ្តល់សេវាកម្មហិរញ្ញវត្ថុបន្ថែមទៀត ទើប ធនាគារ អេស៊ីលីដា និងក្រុមហ៊ុនតូតាល់ ឈានដល់ការចុះហត្ថលេខាលើអនុស្សរណៈ នៃការយោគយល់គ្នាលើកទី២​​នាពេលនេះ ដើម្បីផ្តល់នូវ​ផ្តល់​ជម្រើសហិរញ្ញប្បទាន​គ្រប់ប្រភេទជូនដល់​អតិថិជន សម្រាប់ប្រើប្រាស់ក្នុងដំណើរការអាជីវកម្ម ប្រកបដោយប្រសិទ្ធភាព​ និងសក្តិសិទ្ធភាពបន្ថែមទៀត។​​ លោកស្រីថា  ភាពជាដៃគូនេះក៏បានផ្តល់អត្ថប្រយោជន៍ជាច្រើន ដល់ម្ចាស់ស្ថានីយ ចែកចាយប្រេងឥន្ធនៈរបស់ ក្រុមហ៊ុនតូតាល់ អេនើជី ម៉ាឃីធីង (ខេមបូឌា) ជាមួយនឹង សេវាឥណទានអេស៊ីលីដា រួមមាន ប័ណ្ណឥណទាន (វីសា. ម៉ាស្ទ័រ) ឥណទានសម្រាប់ពាណិជ្ជករ អេស៊ីលីដា ឥណទានសម្រាប់អ្នកចែកចាយ និងសេវាហិរញ្ញប្បទានពាណិជ្ជកម្ម ជាមួយនឹងអត្រាការប្រាក់ពិសេស និងលក្ខខណ្ឌងាយស្រួល៕