ភាពយន្តឯកសារ «វត្ថុបុរាណដែលបាត់បង់ និងការមាតុភូមនិវត្តន៍» ឬ «Loot» ដឹកនាំដោយលោក Don Millar ត្រូវបានដាក់បញ្ចាំងលើកដំបូងនៅរោងភាពយន្ត Legend Exchange Square នៅល្ងាចថ្ងៃទី២៧ ខែមីនា ឆ្នាំ២០២៥នេះ ក្រោមការចូលរួមពីសំណាក់លោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចត្រសិល្បៈ និងភ្ញៀវជាតិ-អន្តរជាតិ និងសាធារណជនជាច្រើននាក់។ ភាពយន្តនេះ គឺបង្ហាញនូវការស៊ើបអង្កេតលើឧក្រិដ្ឋកម្មដែលបានប្រព្រឹត្តកាលពីអតីតកាល និងសកម្មភាពបច្ចុប្បន្នដើម្បីប្រគល់ និងស្តារឡើងវិញនូវបេតិកភណ្ឌវប្បធម៌របស់កម្ពុជា។ ជាមួយគ្នានេះ សាច់រឿងក៏បានលាតត្រដាងនូវបណ្តាញឧក្រិដ្ឋកម្មដែលបានប្រើទាហានកុមារវាយឆ្មក់​ប្រាសាទ​ខ្មែរ​យ៉ាង​ហិង្សា បន្ទាប់​មក​ប្រគល់​វត្ថុ​បុរាណដែលប្រឡាក់​ឈាម​ទៅ​ផ្ទះ​មហាសេដ្ឋី និង​សារមន្ទីរ​ល្បីៗជុំវិញពិភពលោក។ ភាពយន្តឯកសារ «វត្ថុបុរាណដែលបាត់បង់ និងការមាតុភូមនិវត្តន៍» នឹងចាក់បញ្ចាំង! នៅថ្ងៃសុក្រទី២៨ ខែមីនា ម៉ោង​៤រសៀល នៅរោងភាពយ្ត Major Cineplex Aeon ហើយនឹងនៅថ្ងៃសៅរ៍ ទី២៩ ខែមីនា ម៉ោង១០ព្រឹក នៅរោងភាពយន្ត Legend Exchange Square។