ប្រទេសចំនួន៥ រួមមាន ប្រទេសកម្ពុជា វៀតណាម ឡាវ ហ្វីលីពីន កូរ៉េ សហការគ្នា រៀចំពិព័រណ៍ផលអនុផលព្រៃឈើរយៈពេលពីរថ្ងៃ ដើម្បីបង្កើនចំណេះដឹងដល់សមាជិកក្រុមកែច្នៃអនុផលព្រៃឈើត្រូវតាមតម្រូវការទីផ្សារ។​ ពិព័រណ៍នេះ ធ្វើឡើងរយៈពេល២ថ្ងៃ ចាប់ថ្ងៃទី២២​ ដល់ថ្ងៃទី២៣​ ខែមីនា​ ឆ្នាំ២០២៥ នៅសួនច្បារខាងមុខព្រះរាជដំណាក់ ក្រុងសៀមរាប។

លោក ស៊ឹម ប៊ុនធឿន ប្រធានអង្គការកម្មវិធីផ្លាស់ប្ដូរបទពិសោធន៍អនុផលព្រៃឈើប្រចាំកម្ពុជា មានប្រសាសន៍ថា បន្ទាប់ពីចុះអនុសារណៈកិច្ចព្រមព្រាងជាមួយក្រសួងការបរទេស និងសហប្រត្តិបត្តិការអន្តរជាតិ និងក្រសួងបរិស្ថាន ចាប់តាំងពីឆ្នាំ២០០៨ រហូតមកដល់បច្ចុប្បន្ន អង្គការបានអនុវត្តគម្រោងចិញ្ចឹមឃ្មុំនៅភ្នំគូលែន និងផ្តល់វគ្គបណ្តុះបណ្តាលជាច្រើនដល់សហគមន៍តំបន់ការពារធម្មជាតិចំនួន១១​ នៅក្នុងខេត្តសៀមរាប។ ព្រឹត្តិការណ៍នេះ ក៏មានសហគមន៍ព្រៃឈើចំនួន​ ១០​ បានខិតខំការពារធនធានធម្មជាតិ និងបានដើរតួយ៉ាងសំខាន់ក្នុងការលើកស្ទួយជីវភាពគ្រួសារតាមរយៈការកែច្នៃអនុផលព្រៃឈើ។

លោកបានបន្ដថា ពិព័រណ៍ផលអនុផលព្រៃឈើនេះ ដើម្បីផ្សាភ្ជាប់ផលិតផលអនុផលសហគ្រាសសហគមន៍ទៅអ្នកប្រើប្រាស់ បង្កើនចំណេះដឹងដល់សមាជិកក្រុមកែច្នៃអនុផលព្រៃឈើត្រូវតាមតម្រូវការទីផ្សារ និងបង្កើនចំណេះដឹងលើការកសាងផែនការអាជីវកម្មរបស់សហគមន៍ក្នុងការតភ្ជាប់ទៅនឹងទីផ្សារ។

លោក ច័ន្ទ ប៉ុណ្ណិកា អនុប្រធានរដ្ឋបាលព្រៃឈើ នៃក្រសួងកសិកម្ម រុក្ខាប្រមាញ់ និងនេសាទ​ បានឱ្យដឹងថា ប្រទេសកម្ពុជា ជាប្រទេសមួយក្នុងតំបន់ទន្លេមេគង្គដែលពឹងអាស្រ័យលើវិស័យកសិកម្ម និងពលរដ្ឋនៅតាមសហគមន៍នៅតែពឹងអាស្រ័យលើផល​ និងអនុផលព្រៃឈើ ដែលជាប្រភពចំណីអាហារផង ប្រភេទឱសថបុរាណផង បំពេញត្រូវការប្រើប្រាស់ក្នុងផ្ទះផង និងពិសេសជាងនេះគឺ​ បានបង្កើនប្រាក់ចំណូលក្នុងគ្រួសារផង និងរួមចំណែកបង្កើនថវិកាជាតិផងដែរ។

បច្ចុប្បន្ន​ មានសហគមន៍ព្រៃឈើសរុបចំនួន ៦៥៥ ទូទាំងប្រទេស ដែលសហគមន៍ទាំងនេះបានដើរតួយ៉ាងសំខាន់ក្នុងការរួមចំណែកការពារ និងអភិរក្សព្រៃឈើកម្ពុជា។​ ក្រៅពីកិច្ចការពារ សហគមន៍ពួកគេក៏អាចអាស្រ័យផលពីព្រៃសហគមន៍របស់ពួកគេ ដូចជាបន្លែព្រៃ ផ្លែឈើព្រៃ ពិសេស ការប្រមូលអនុផលព្រៃឈើមកកែច្នៃជារបស់ប្រើប្រាស់ផង សម្រាប់បង្កើនចំណូលក្នុងគ្រួសារផង។ លោកបានជំរុញអង្គការដៃគូរអភិវឌ្ឍន៍ វិស័យឯកជន អាជ្ញាធរ សហគមន៍ និងស្ថាប័នពាក់ព័ន្ធនានាខិតខំប្រឹងប្រែងបន្ថែមទៀតលើការងារគ្រប់គ្រង និងអភិវឌ្ឍអនុផលព្រៃឈើនៅប្រទេសកម្ពុជាប្រកបដោយនិរន្តរភាព។

ចំណែកលោកស្រី ម៉ុម ថានី រដ្ឋលេខាធិការក្រសួងបរិស្ថាន បានឱ្យដឹងដែរថា ប្រជាពលរដ្ឋកម្ពុជាប្រមាណជា ៦៨% ពឹងអាស្រ័យលើធនធានព្រៃឈើ អនុផលព្រៃឈើ និងការបរបាញ់សត្វសម្រាប់ការចិញ្ចឹមជីវិតរបស់ពួកគេ។ សកម្មភាពទាំងនោះរួមមាន​ ការបេះផ្លែឈើព្រៃ បន្លែព្រៃ ផ្តៅ ឬស្សី ទឹកឃ្ញុំ ជ័រទឹក ជ័រចុង សំរ៉ង រំពាក់ និងឱសថបុរាណនានា។ នៅឆ្នាំ២០១០ រហូតមកដល់ឆ្នាំ២០១៥ ចំណូលដែលទទួលបានពីផ្តៅ មានចំនួន ១,៥លានដុល្លារ​ ក្នុងមួយឆ្នាំៗ​ ក្នុងនោះមានពលរដ្ឋប្រមាណជា​ ៥ពាន់គ្រួសារ ដែលមួយគ្រួសារអាចរកចំណូលបាន ៨៦ដុល្លារ​ ក្នុងមួយខែ។

ជាមួយគ្នានេះផងដែរ គេសង្កេតឃើញថា​ មានសហគ្រាសសហគមន៍ជាច្រើនត្រូវបានចងក្រងបង្កើតឡើងដែលបម្រើដល់វិស័យ ផ្តៅ រំពាក់ ទឹកឃ្មុំព្រៃ និងឫស្សី​ ជាដើម៕