នៅក្នុងឱកាសជួបសំណេះសំណាលជាមួយ ក្រុមប្រឹក្សាឃុំ សង្កាត់ ស្មៀន និងនាយប៉ុស្តិ៍នគរបាលរដ្ឋបាល នៅក្នុងខេត្តកំពង់ឆ្នាំង នាព្រឹកថ្ងៃទី២១ ខែមីនា ឆ្នាំ២០២៥ លោកបណ្ឌិត ម៉ុង ឬទ្ធី បានមានប្រសាសន៍បញ្ជាក់ឱ្យដឹងថា ដើម្បីចូលរួមជាមួយរាជរដ្ឋាភិបាល ក្នុងការលើកកម្ពស់ ក្នុងវិស័យកសិកម្ម លោកកំពុងតែរកដៃគូ ដើម្បីសាងសង់រោងចក្រផលិតជី ឱ្យមានគុណភាពល្អ ហើយតម្លៃសមរម្យសម្រាប់ផ្គត់ផ្គង់ដល់កសិករ ដើម្បីប្រើប្រាស់ឱ្យមានគុណភាពល្អ និងចំណាយថវិកាតិច។ លោកបណ្ឌិត ម៉ុង ឬទ្ធី សង្ឃឹមយ៉ាងមុតមាំថា នៅដើមឆ្នាំ២០២៦ខាងមុខនេះ កម្ពុជានឹងមានរោងចក្រផលិតជីដោយខ្លួនឯង ដែលត្រូវចំណាយដើមទុនអស់ប្រម៉ាណ​ ២០លាន ដុល្លារ។ បច្ចុប្បន្នលោកបណ្ឌិត មានវ័យ​ ៧០ ឆ្នាំទៅហើយ តែដើម្បីចូលរួមបម្រើប្រជាជន លោកបណ្ឌិតត្រូវតែលះបង់គ្រប់បែបយ៉ាង បម្រើដល់ប្រជាជនយើង ឱ្យបានសម្រេច។ លោកបណ្ឌិត បានឱ្យដឹងទៀតថា កាលពីថ្ងៃទី២០ ខែមីនា មានជនជាតិជប៉ុនមួយក្រុម បានមកជួបពិភាក្សាជាមួយលោក​ ដោយពួកគេនឹងជួយបង្កើតជាមេជីធម្មជាតិសម្រាប់ជួយបង្កើនទិន្នផលផង សម្រាប់ការពារបរិស្ថានផង។ ចំណែករោងចក្រផលិតជីនេះ មិនអាចធ្វើតែមួយកន្លែងបាននោះទេ គឺត្រូវការជាច្រើនកន្លែង ពីព្រោះដើម្បីបម្រើជូនប្រជាពលរដ្ឋទូទាំងប្រទេស កុំឱ្យពិបាកដឹកឆ្ងាយ នាំឱ្យខាតបង់ថវិកាច្រើន។ លោកបណ្ឌិត ម៉ុង ឬទ្ធី ប្រធានក្រុមសមាជិកព្រឹទ្ធសភាភូមិភាគទី៧ បានផ្តាំផ្ញើដល់ក្រុមប្រឹក្សាឃុំ សង្កាត់ និងនាយប៉ុស្តិនគរបាលរដ្ឋបាល ទាំងអស់ត្រូវបង្កើនការយកចិត្តទុកដាក់បន្ថែមទៀត ដោយត្រូវបន្តជំរុញការអនុវត្តគោលនយោបាយភូមិ ឃុំ សង្កាត់ មានសិវត្ថិភាព និងការផ្តល់សេវ៉ាសាធារណៈ ជូនប្រជាពលរដ្ឋ ឱ្យបានទាន់ពេលវេលា៕