រាជរដ្ឋាភិបាលកម្ពុជា បានណែនាំឱ្យក្រសួងពាណិជ្ជកម្ម យកចិត្តទុកដាក់ ចំពោះការនាំចូលផ្លែទុរេនស្រស់ពីវៀតណាម និងថៃ បន្ទាប់ពី អាជ្ញាធរគយនៃប្រទេសចិន បានរកឃើញមានផ្ទុកសារធាតុគីមី Basic Yellow 2 ឬ Auramine O និង Cadmium ដែលនាំអោយប៉ះពាល់ដល់សុខភាពរបស់ប្រជាពលរដ្ឋ។ នេះបើយោងតាមលិខិតរបស់ឧបនាយករដ្ឋមន្រ្តីប្រចាំការ រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី ជម្រាបជូនមកកាន់លោកស្រី ចម និម្មល រដ្ឋមន្រ្តីក្រសួងពាណិជ្ជកម្ម កាលពីពេលថ្មីៗនេះ។ ជាមួយគ្នានេះដែរ រាជរដ្ឋាភិបាលកម្ពុជា បានឃើញនិងសម្រេចឱ្យក្រសួងពាណិជ្ជកម្ម ត្រូវយកចិត្តទុកដាក់ទាំងការនាំចូលទុរេន និងការដាំដុះក្នុងប្រទេស ដោយត្រូវពន្លឿនកិច្ចការរៀបចំកសាងសមត្ថភាពមន្ទីរពិសោធន៍ លើការវិភាគរកសារធាតុ Basic Yellow 2 ឬ Auramine O និង Cadmium ដោយចាត់ទុកជាការប្រញាប់ ក្នុងរយៈពេលដ៏ខ្លីខាងមុខ ដើម្បីជួយគាំទ្រដល់អគ្គនាយកដ្ឋានគយនិងរដ្ឋាករកម្ពុជា ក្នុងការវិភាគនៅតាមមាត់ច្រក នៅពេលដែលមានការនាំចូល ផ្លែទុរេនស្រស់ ដែលមិនមានវិញ្ញាបនបត្របញ្ជាក់ និងធានាមិនឱ្យមានការប្រើប្រាស់សារធាតុទាំងពីរនេះលើផលិតផលក្នុងស្រុក ដើម្បីការពារអ្នកប្រើប្រាស់។