កម្ពុជា-ឥណ្ឌា បន្តរក្សាជំហរពង្រឹងកិច្ចសហប្រតិបត្តិការវិស័យសុខាភិបាល តាមរយៈ​ប្រព័ន្ធ​ថែ​ទាំ​សុខភាព និងភាពជាដៃគូរវាងប្រទេសទាំងពីរ ជាពិសេសការពង្រឹងច្បាប់ និងលើក​កម្ពស់​ទំនុក​ចិត្ត​លើ​វិស័យឯកជន.. ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានទទួលជួបសំដែងការគួរសម និង​ពិភាក្សា​ការងារជាមួយ ឯកឧត្តម វណ្ណឡាលវ៉ូណា បយធ្លង់ (Vanlalvawna BAWITLUNG) ឯក​អគ្គ​រដ្ឋទូតឥណ្ឌា ប្រចាំព្រះរាជា ណាចក្រកម្ពុជា និងគណៈប្រតិភូ, នៅទីស្តីការក្រសួងសុខាភិបាល។ ឯកឧត្តម សាស្ត្រាចារ្យ ឈាង រ៉ា បានស្វាគមន៍ និងអបអរសាទរ ឯកឧត្តម ឯកអគ្គរដ្ឋទូត ដែល​ត្រូវ​បាន​ទទួល​ការតែងតាំងជាឯកអគ្គរដ្ឋទូតនៃសាធារណរដ្ឋឥណ្ឌា ប្រចាំព្រះរាជា ណាចក្រកម្ពុជា។ ឯកឧត្តម​សាស្ត្រាចារ្យរដ្ឋមន្ត្រី ក៏បានជម្រាបជូនគណៈប្រតិភូ អំពីផែនការអាទិភាព​របស់​ក្រសួង​សុខា​ភិបាល ក្នុងអាណត្តិទី៧ ដែលត្រូវចាប់ផ្តើមអនុវត្តរួមមាន ការពង្រឹងសេវាមណ្ឌលសុខភាព មន្ទីរ​ពេទ្យបង្អែកស្រុក-ខេត្ត តាមរយៈការកែលម្អអគារ បំពាក់សម្ភារបរិក្ខារពេទ្យ ឱសថ និងការ​បណ្តុះ​បណ្តាល​បុគ្គលិក ព្រមទាំងការប្រយុទ្ធនឹងជំងឺមិនឆ្លង ការពង្រឹងសមត្ថភាព​ភាព​ជា​អ្នក​ដឹក​នាំ និងនិវានុវត្តន៍ និងការអភិវឌ្ឍន៍ សុខភាពឌីជីថល។ ឯកឧត្តម ឯកអគ្គរដ្ឋទូត បានថ្លែងអំណរគុណ យ៉ាងជ្រាលជ្រៅ ចំពោះឯកឧត្តម​ សាស្ត្រាចា​រ្យ​រដ្ឋ​មន្ត្រី​ ដោយបានបញ្ជាក់ជំហរ ក្នុងការបន្តកិច្ចសហប្រតិបត្តិការជាមួយក្រសួងសុខាភិបាល គាំទ្រ​ផែន​ការ​អាទិភាពរបស់ក្រសួងសុខាភិបាល និងពង្រីក​វិសាល​ភាព​នៃ​កិច្ច​សហ​ប្រតិបត្តិការ​ទ្វេភា​គី​កម្ពុជា​-ឥណ្ឌា លើការអភិវឌ្ឍន៍សុខភាពឌីជីថល ភាពជាដៃគូរវាងវិស័យសាធារណៈ និងឯកជន ដូច​ជាការវិនិយោគបង្កើតមន្ទីរពេទ្យកម្រិតអន្តរជាតិដែលមានគុណភាពខ្ពស់ តាមរយៈ​កិច្ច​សហការ​យ៉ាង​ជិតស្និទ្ធជាមួយក្រុមការងារបច្ចេកទេសរបស់ក្រសួងសុខាភិបាល។ ឯកឧត្តមសាស្ត្រាចារ្យរដ្ឋមន្ត្រី បានថ្លែងអំណរគុណយ៉ាងជ្រាលជ្រៅដល់ប្រជាជន និងរដ្ឋាភិបាល នៃសាធារណរដ្ឋឥណ្ឌា តាមរយៈឯកអគ្គរដ្ឋទូត ដែលបានប្តេជ្ញា​បន្ត​ពង្រឹង​កិច្ច​សហ​ប្រតិប​ត្តិការ​ជា​មួយ​ក្រសួងសុខាភិបាល៕