ខេត្តព្រះសីហនុ ៖ លោក ស ក្កដា អភិបាលក្រុងព្រះសីហនុបានឲ្យដឹងថា រដ្ឋបាលក្រុង នឹងរៀបចំសណ្តាប់ធ្នាប់ របៀបរៀបរយតាមបណ្ដោយផ្លូវសាធារណៈ(ផ្លូវជុំវិញផ្សារលើ) ទៅតាមប្លង់ប្រព័ន្ធសុរិយោដីស្ថិតក្នុងភូមិ១ និងភូមិ២ សង្កាត់លេខ៤ក្រុងព្រះសីហនុ ខេត្តព្រះសីហនុ។ រដ្ឋបាលក្រុងព្រះសីហនុ ជូនដំណឹងដល់ប្រជាពលរដ្ឋមួយចំនួនដែលបានសាងសង់ផ្ទះ សំយ៉ាបផ្ទះ របង និងសំណង់ផ្សេងៗមិនរៀបរយលើដីចំណីផ្លូវសាធារណៈ(ផ្លូវជុំវិញបរិវេណផ្សារលើ) ទៅតាមប្លង់ប្រព័ន្ធសុរិយោដីស្ថិតក្នុងភូមិ១ និងភូមិ២ សង្កាត់លេខ៤ ក្រុងព្រះសីហនុ ខេត្តព្រះសីហនុ ព្រោះការសង់សំណង់មិនរៀបរយ ការលក់ដូរលើចិញ្ចើមផ្លូវ ការដាក់សម្ភារផ្សេងៗលើចិញ្ចើមផ្លូវសាធារណៈរបស់បងប្អូនបានធ្វើឱ្យប៉ះពាល់សណ្តាប់ធ្នាប់ របៀបរៀបរយ សោភ័ណភាព ការធ្វើដំណើររបស់បងប្អូនប្រជាពលរដ្ឋ ការកកស្ទះចរារណ៍ ព្រមទាំងបង្កការលំបាកដល់រថយន្តពន្លត់អគ្គិភ័យ និងរថយន្តសង្គ្រោះបន្ទាន់ចូលទៅអន្តរាគមន៍នៅពេលមានគ្រោះអគ្គិភ័យ ឬគ្រោះថ្នាក់ផ្សេងៗកើតមានឡើងជាយថាហេតុ។ រដ្ឋបាលក្រុងរួមជាមួយមន្ទីរជំនាញពាក់ព័ន្ធនឹងចុះធ្វើការវាស់វែង ដើម្បីកំណត់ចំណីផ្លូវខាងលើនេះទៅតាមប្លង់ប្រព័ន្ធសុរិយោដី ចាប់ពីថ្ងៃទី២៧ ខែកុម្ភៈ ឆ្នាំ២០២៥ ។ ដូចនេះ រដ្ឋបាលក្រុងព្រះសីហនុ ណែនាំដល់បងប្អូនប្រជាពលរដ្ឋដែលមានការពាក់ព័ន្ធត្រូវបញ្ឈប់រាល់សកម្មភាពសាងសង់សំណង់ផ្សេងៗនៅលើដីចំណីផ្លូវសាធារណៈខាងលើ ចាប់ពីថ្ងៃជូនដំណឹងនេះតទៅ និងត្រូវធ្វើការរុះរើសំណង់មិនរៀបរយដោយស្ម័គ្រចិត្ត និងដឹកជញ្ជូនយកចេញឱ្យអស់ពីទីតាំងដីចំណីផ្លូវនៅមុនថ្ងៃទី១៣ ខែមីនា ឆ្នាំ២០២៥ ជាកំហិត។ ផុតកាលបរិច្ឆេទកំណត់ខាងលើ ក្នុងករណីមិនអនុវត្តតាមការណែនាំ រដ្ឋបាលក្រុងនឹងចាត់វិធានការរុះរើដោយមិនទទួលខុសត្រូវលើការខូចខាត ឬបាត់បង់សម្ភារឡើយ៕