cambodia-nation-media.com

វិស័យឧស្សាហកម្មនៅកម្ពុជាបានបន្តរីកចម្រើនយ៉ាងខ្លាំងក្នុងឆ្នាំ២០២៤ ដោយមានការកើនឡើងទាំងចំនួនរោងចក្រ និងកម្លាំងពលកម្ម។ ទិន្នន័យបង្ហាញថា រោងចក្រថ្មីចំនួន ៣២៦ បានបើកដំណើរការ។ រីឯ កម្លាំងពលកម្មសរុបក្នុងវិស័យនេះកើនដល់ ១,១៦លាននាក់ ដែលក្នុងចំណោមនេះ ស្ត្រីមានអត្រាជិត ៧៤ ភាគរយ។ ការកើនឡើងនៃកម្លាំងពលកម្មបង្ហាញថា កម្ពុជាមានឱកាសការងារច្រើនសម្រាប់ប្រជាជន ខណៈរាជរដ្ឋាភិបាលខិតខំអភិវឌ្ឍជំនាញបន្ថែម ដើម្បីអាចប្រកួតប្រជែងក្នុងទីផ្សារតំបន់និងពិពភលោក។

វិស័យឧស្សាហកម្មរីកចម្រើន មានបើករោងចក្រថ្មីច្រើនដោយសារការវិនិយោគបន្ថែម និងសេដ្ឋកិច្ចដែលកំពុងមានការលូតលាស់។ រោងចក្រថ្មីចំនួន ៣២៦ ត្រូវបានបើកដំណើរការ ក្នុងឆ្នាំ ២០២៤ ធ្វើឱ្យចំនួនសរុបនៃរោងចក្រធុនធំកើនដល់ ២,៤២៥ រោងចក្រ។

សកម្មភាពនេះបានបង្កើនឱកាសការងារច្រើនឡើងក្នុងប្រទេស ដោយកម្លាំងពលកម្មកើនឡើងជាលំដាប់។ ចំនួនកម្មករក្នុងវិស័យឧស្សាហកម្មបានកើនដល់ ១,១៦០,១៨១ នាក់ ក្នុងនោះមានស្ត្រីចំនួន ៨៥៤,៨១៩ នាក់ (ស្មើនឹង ៧៣.៦៨%)។ នេះបង្ហាញថា កម្ពុជាមានការកើនឡើង ១១.៥២% (១១៩,៨៤៨ នាក់) បើប្រៀបធៀបទៅនឹងឆ្នាំ ២០២៣។ កំណើននេះបង្ហាញពីការជឿជាក់របស់វិនិយោគិន និងសេដ្ឋកិច្ចដែលកំពុងរីកចម្រើន។នេះបើតាមទិន្នន័យពីក្រសួងឧស្សាហកម្ម វិទ្យាសាស្ដ្រ បច្ចេកវិទ្យា និងនវានុវត្តន៍។

ទិន្នន័យដដែល បន្តថា ចំនួនរោងចក្រដែលបិទទ្វាក្នុងឆ្នាំ ២០២៤ មានចំនួន ២៦ រោងចក្រ។ ទោះបីជាយ៉ាងណា ការកើនឡើងនៃកម្លាំងពលកម្ម និងចំនួនរោងចក្រថ្មី បញ្ជាក់ថា កម្ពុជាកំពុងក្លាយជាមជ្ឈមណ្ឌលផលិតកម្មសំខាន់មួយនៅក្នុងតំបន់។

អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ ឯកឧត្តម កត្តា អ៊ន បានប្រាប់ថា ៖រាជរដ្ឋាភិបាលគ្រប់អាណត្តិ បានយកចិត្តទុកយ៉ាងខ្លាំងក្នុងការពង្រីកទីផ្សារការងារជូនប្រជាជនកម្ពុជាតាមរយៈការទាក់ទាញការបង្កើតរោងចក្រឧស្សាហកម្មនៅកម្ពុជា។

ឯកឧត្តម កត្តា អ៊ន មានប្រសាសន៍ថា ៖ «រាជរដ្ឋាភិបាលអាណត្តិមុនៗ ក៏ដូចជា រាជរដ្ឋាភិបាលបច្ចុប្បន្ននេះ តាមរយៈក្រសួងការងារ បានយកចិត្តទុកដាក់ក្នុងការពង្រីកទីផ្សារការងារ ដើម្បីស្រូបកម្លាំងពលកម្ម ការងារដល់យុវជនយើង។ការអង្កេតយើងឃើញថា ក្នុងមួយឆ្នាំៗ យុវជនដែលមានតម្រូវការពលកម្មក្នុងរង្វង់២០ម៉ឺននាក់ ដូច្នេះហើយ គោលនយោបាយរបស់រាជរដ្ឋាភិបាលបានពង្រីកវិស័យឧស្សាហកម្មនេះ ដែលជាកត្តាចម្បងក្នុងការស្រូបទាញកម្លាំងយុវជនយើង ជាពិសេស ការផ្តល់នូវជំនាញសម្រាប់ចូលបម្រើការងារនៅតាមរោងចក្រសហគ្រាសខ្នាតតូច មធ្យម និងធំ»។

ឯកឧត្តម កត្តា អ៊ន បានបន្ថែមទៀតថា បច្ចុប្បន្ននេះ វិស័យឧស្សាហកម្មដើរតួនាទីសំខាន់នៅក្នុងសេដ្ឋកិច្ចកម្ពុជា យើងឃើញថា មានរោងចក្រ/សហគ្រាស សរុបចំនួនជាង ៤ ៤០០០ រោងចក្រ/សហគ្រាស និងមានកម្មករនិយោជិតធ្វើការជាង ១លាន ៨សែននាក់។ ចំនួនដ៏ច្រើននេះ គឺជាកត្តាគ្រឹះនៃសេដ្ឋកិច្ច ដូច្នេះហើយ បងប្អូនកម្មករនិយោជិកក៏បានទទួលផលពីវិស័យឧស្សាហកម្មនេះ ដែលអាចផ្តល់ចំណូលប្រចាំថ្ងៃ ជូនកម្មករនិយោជិកបានសមរម្យ។

ឯកឧត្តម និយាយថា៖ «យើងឃើញថា ក្នុងរយៈពេលមួយទសវត្សរ៍ចុងក្រោយនេះជីវភាពបងប្អូនកម្មករនិយោជិកមានការប្រែប្រួល ដោយពួកគាត់មានលទ្ធភាពក្នុងការរស់នៅសមរម្យ មានលទ្ធភាពក្នុងការបញ្ជូនកូនទៅរៀន មានលទ្ធភាពក្នុងការកសាងលំនៅឋាន ក៏ដូចជា ទិញមធ្យោបាយធ្វើដំណើរផ្សេងៗ។ នេះយើងអាចវាយតម្លៃជារួមថាប្រទេសកម្ពុជាយើងបានចាកផុតពីបន្ទាត់ភាពក្រីក្រ ដូច្នេះជីវភាពបងប្អូនកម្មករនិយោជិក យើងបានចាកផុត ឈានទៅរកប្រទេសមានចំណូលមធ្យមកម្រិតខ្ពស់នៅពេលឆាប់ៗខាងមុខនេះ ដែលជាកត្តាចម្បងដែលធ្វើឱ្យកម្ពុជាកាន់តែរីកចម្រើនទៅមុខទៀត ហើយជីវភាពប្រជាពលរដ្ឋយើងកាន់តែរីកចម្រើនថែមទៀតពីមួយថ្ងៃទៅមួយថ្ងៃផងដែរ»។

វិស័យឧស្សាហកម្មរបស់កម្ពុជានៅតែបន្តរីកចម្រើន ដោយតម្លៃសរុបនៃផលិតផលឧស្សាហកម្មបានកើនឡើងលើសពី១៥ពាន់លានដុល្លារអាមេរិកក្នុងឆ្នាំ២០២៤ ។ ក្នុងនោះ ជិត ៤ពាន់លានដុល្លារអាមេរិក ផ្គត់ផ្គង់នៅក្នុងទីផ្សារក្នុងស្រុក និង ជាង ១១ពាន់លានដុល្លារអាមេរិកត្រូវបានផ្គត់ផ្គង់ទៅទីផ្សារអន្តរជាតិ។ នេះបើតាមរបាយការណ៍បូកសរុបលទ្ធផលការងារឆ្នាំ២០២៤ និងលើកទិសដៅការងារឆ្នាំ២០២៥ របស់ក្រសួងឧស្សាហកម្ម វិទ្យាសាស្ដ្រ បច្ចេកវិទ្យា និងនវានុវត្តន៍៕