ពិធីទទួលដំណើរមាតុភូមិនិវត្តន៍កងរាជអាវុធហត្ថលេខ២៧៨ កងអនុសេនាធំវិស្វកម្មពហុជំនាញលេខ៨៣៦ និងកងកម្ទេចគ្រឿងផ្ទុះលេខ៩៨-ទី២ ដែលបានបញ្ចប់បេសកកម្មរក្សាសន្តិភាពអ.ស.ប នៅសាធារណរដ្ឋស៊ូដង់ខាងត្បូង លីបង់ និងអាហ្រ្វិកកណ្តាល.. ពិធីនេះ ធ្វើឡើង ក្រោមអធិបតីភាពដ៏ខ្ពង់ខ្ពស់ ឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានគណៈកម្មាធិការជាតិសន្តិសុខលម្ហសមុទ្រ នៅសាលាហ្វឹកហ្វឺនកងកម្លាំងរក្សាសន្តិភាពពហុជាតិ(PKO) ស្រុកភ្នំស្រួច ខេត្តកំពង់ស្ពឺ នាថ្ងៃ០៣មិនា។ ឯកឧត្ដម ឧបនាយករដ្ឋមន្ត្រី បានវាយតម្លៃខ្ពស់ចំពោះនាយទាហាន នាយទាហានរង និងពលទាហាននៃកងរាជអាវុធហត្ថលេខ២៧៨ កងវិស្វកម្មពហុជំនាញលេខ៨៣៦ កងកម្ទេចគ្រាប់មិនទាន់ផ្ទះលេខ៩៨-ទី២ ដែលមានសមត្ថភាពកលក្នុងការកសាងសមិទ្ធផលយ៉ាងច្រើនជូនកងយោធពលខេមរភូមិន្ទ បានរួមចំណែកក្នុងការលើកកម្ពស់កិត្យានុភាពកម្ពុជាលើឆាកអន្តរជាតិ ក្នុងនោះកងរាជអាវុធហត្ថលេខ២៧៨ និងកងវិស្វកម្មពហុជំនាញលេខ៨៣៦ ដឹកនាំដោយមេបញ្ជាការជានារី។ ការណ៍នេះបានបង្ហាញថា ការចូលរួមរបស់ស្ត្រីក្នុងយុគសម័យឌីជីថលនេះ ពិតជាមានសារសំខាន់ណាស់ដើម្បីរួមចំណែកថែរក្សាសន្តិភាព និងឆ្ពោះទៅសម្រេចចក្ខុវិស័យតាមការប្តេជ្ញាចិត្តរបស់រាជរដ្ឋាភិបាល ក្នុងការរួមចំណែកខិតខំប្រឹងប្រែងអនុវត្តតាមកំណែទម្រង់ប្រតិបត្តិការរក្សាសន្តិភាព ក្នុងការបង្កើនការចូលរួមរបស់ស្ត្រីឱ្យបាន២០% នៅគ្រប់តំបន់បេសកកម្ម ទាំងក្នុងកងទីបញ្ជាការ ពិសេសតួនាទីជានាយទាហានសេនាធិការ និងសង្កេតការណ៍យោធា៕