សមត្ថកិច្ចជំនាញ ខេត្តកំពង់ធំ បង្រ្កាប និងរឹបអូស ឈើចម្រៀក ប្រភេទលេខ ២ ប្រមាណជាង១៣ម៉ែត្រគូប នៅក្នុងតំបន់ព្រៃឡង់ ជាប់ព្រំប្រទល់ ខេត្តកំពង់ធំ និងខេត្តក្រចេះ កងកម្លាំងអន្តរាគមន៍នៃបញ្ជាការដ្ឋានតំបន់ប្រតិបត្តិការសឹករងកំពង់ធំ សហការជាមួយកម្លាំងនៃមន្ទីរបរិស្ថានខេត្តកំពង់ធំ ចេញប្រតិបត្តិការបង្ក្រាបនិងរឹបអូសយកឈើចម្រៀកប្រមាណជាង១៣ ម៉ែត្រគូប ដែលក្រុមជនល្មើសលួចកាប់នឹងអាជាឈើចម្រៀកនៅក្នុងតំបន់ព្រៃឡង់ ជាប់ព្រំប្រទល់ខេត្តកំពង់ធំ និងខេត្តក្រចេះ នាពេលថ្មីៗនេះ។ សូមជំរាបថា សកម្មភាព នៃការបង្ក្រាបខាងលើ ធ្វើឡើងក្រោយទទួលបានព័ត៌មានពីបណ្តាញសម្ងាត់ ថាមានសកម្មភាព លួចកាប់នឹងអាឈើនៅក្នុងភូមិសាស្ត្រព្រៃឡង់ តំបន់ក្បាលអូរទឹកថ្លា ជាប់គ្រប់ប្រទល់ខេត្តកំពង់ធំ និងខេត្តក្រចេះ ដែលពួកក្រុមជនល្មើសតែងតែលួចកាប់នឹងអាឈើនៅតំបន់នេះព្រោះមានភាពងាយស្រួលដោយសារ មានចម្ងាយឆ្ងាយពីសកម្មភាពរបស់សមត្ថកិច្ចខេត្តទាំងពីរ ខេត្តកំពង់ធំ និងខេត្តក្រចេះ ។ ហើយក្នុងពេលប្រតិបត្តិការនេះក្រុមជនល្មើសបានដឹងខ្លួនមុន ហើយបានរត់គេចខ្លួនបាត់ ខណះ កិច្ចប្រតិបត្តិការនេះ បានប្រើប្រាស់រយៈពេលពីរយប់បីថ្ងៃ ដោយចាប់ផ្ដើមពីម៉ោង៣ ទៀបភ្លឺថ្ងៃទី២៥ ដល់ល្ងាចថ្ងៃទី២៧ ខែកុម្ភៈ ឆ្នាំ២០២៥។ យ៉ាងណា សមត្ថកិច្ចជំនាញ និងធ្វើការស្រាវជ្រាវរកមុខសញ្ញាជនល្មើស ដែលបានលួចកាប់ឈើនៅក្នុងតំបន់ព្រៃឡង់ជាប់ព្រំប្រទល់ខេត្តកំពង់ធំ និងខេត្តក្រចេះ នេះ ដើម្បីចាត់វិធានការតាមផ្លូវច្បាប់ ដោយគ្មានការលើកលែងឡើយ៕