អាជ្ញាធរសង្កាត់ស្ទឹងមានជ័យទី១ បានឃាត់ម៉ូតូ និងម៉ូតូកង់បី ដែលបើកបរបញ្ច្រាសផ្លូវ ចំនួន ១០៥គ្រឿង ជាពិសេស អ្នកបើកបរតាមក្រោយ រថយន្ត សារ៉ែនអាទិភាព។ ការឃាត់នេះ គឺជាផ្នែកមួយ ក្នុងវិធានការអនុវត្តច្បាប់ចរាចរណ៍ ដើម្បីរៀបចំសណ្តាប់ធ្នាប់ កាត់បន្ថយការកកស្ទះ និងទប់ស្កាត់ គ្រោះថ្នាក់ចរាចរណ៍ នៅត្រង់ចំណុចកំណាត់ផ្លូវ២១៧ (មុន្នីរ៉េត) ស្ថិតនៅភូមិថ្មី សង្កាត់ស្ទឹងមានជ័យទី១ ខណ្ឌមានជ័យ រាជធានីភ្នំពេញ។ ម៉ូតូទាំងអស់ ត្រូវបានរក្សាទុកនៅប៉ុស្តិ៍នគរបាលរដ្ឋបាលស្ទឹងមានជ័យទី១ រយៈពេល ១ថ្ងៃ ក្រោយពេលឃាត់ ដើម្បីឱ្យម្ចាស់ម៉ូតូមកធ្វើកិច្ចសន្យា និងអប់រំណែនាំ មុនពេលប្រគល់ជូនវិញ។ មុនឈានចូលដល់ការប្រើប្រាស់វិធានការរឹតបន្តឹងច្បាប់នេះ លោក ជា សារ៉េត ចៅសង្កាត់ស្ទឹងមានជ័យទី១ និងជាប្រធានគណៈបញ្ជាការឯកភាព បានឱ្យដឹងថា នាពេលកន្លងមក សាលាសង្កាត់សហការជាមួយប៉ុស្តិ៍នគរបាលរដ្ឋបាល បានធ្វើសេចក្តីណែនាំជូនដំណឹងជារឿយៗ ដល់អ្នកបើកបរប្រើប្រាស់ផ្លូវដែលឆ្លងកាត់ត្រង់ចំណុចខាងលើ ដើម្បីណែនាំកុំឱ្យបន្តបើកបរល្មើសបញ្ច្រាស់ទិស ដែលធ្វើឱ្យប៉ះពាល់ដល់ការធ្វើដំណើរ និងសណ្តាប់ធ្នាប់សាធាណៈ។ ប៉ុន្តែការជូនដំណឹងនោះ អ្នកបើកបរហាក់មិនបានជ្រាប និងមិនព្រមអនុវត្តតាម ដោយអ្នកប្រើប្រាស់ផ្លូវ នៅតែបន្តបើកបំពានបញ្ច្រាស់ ជាពិសេសការបើកបរតាមក្រោយរថយន្តសារ៉ែន នាំឱ្យប៉ះពាល់សណ្តាប់ធ្នាប់ និងបង្កគ្រោះថ្នាក់ចរាចរណ៍បាត់បង់អាយុជីវិតជារឿយៗ៕