cambodia-nation-media.com

រដ្ឋាភិបាលនឹងពង្រីកវិសាលភាពកម្មវិធីពិសេសជំរុញការវិនិយោគនៅទូទាំងប្រទេស បន្ទាប់ពីអនុវត្តន៍ជោគជ័យក្នុងខេត្តព្រះសីហនុ

ដើម្បីលើកទឹកចិត្តដល់វិនិយោគិន និងធុរជនបន្ថែមទៀត រដ្ឋាភិបាលនឹងពង្រីកវិសាលភាពកម្មវិធីពិសេសជំរុញការវិនិយោគក្នុងក្របខណ្ឌទូទាំងប្រទេស បន្ទាប់ពីកម្មវិធីនេះ បានអនុវត្តន៍បានជោគជ័យជាទីមោទននៅក្នុងខេត្តព្រះសីហនុ។នេះបើតាមការអះអាងរបស់មន្រ្តីជាន់ខ្ពស់ក្រសួងសេដ្ឋកិច្ច និងហិរញ្ញវត្ថុ។

ក្រោមគំនិតផ្តួចផ្តើមដោយ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានប្រកាសដាក់ឱ្យអនុវត្តជាផ្លូវការនូវ កម្មវិធីពិសេសជំរុញការវិនិយោគក្នុងខេត្តព្រះសីហនុ ឆ្នាំ២០២៤ កាលថ្ងៃទី ៣១ ខែ មករា ឆ្នាំ ២០២៤ ហើយ កម្មវិធីពិសេសជំរុញការវិនិយោគក្នុងខេត្តព្រះសីហនុ កំពុងអនុវត្តន៍បន្តមកដល់ពេលបច្ចុប្បន្ន។

ដើម្បីផ្ដល់ការលើកទឹកចិត្តដល់អ្នកវិនិយោគបន្ថែមទៀត ឯកឧត្តម ហ៊ាន សាហ៊ីប រដ្ឋលេខាធិការក្រសួងសេដ្ឋកិច្ចនិងហិរញ្ញវត្ថុ និងជាប្រធានក្រុមការងារជំរុញការវិនិយោគក្នុងខេត្តព្រះសីហនុ បានថ្លែងថា រាជរដ្ឋាភិបាលនឹងដាក់ឱ្យអនុវត្តន៍កម្មវិធីពិសេសជំរុញការវិនិយោគនៅទាំងប្រទេស ដែលអាចនឹងអនុវត្តក្នុងឆ្នាំនេះតទៅ។

ឯកឧត្តម ហ៊ាន សាហ៊ីប ថ្លែងដូច្នេះថា៖ «ការវិនិយោគឯកជននៅកម្ពុជា ដូចដែលឯកឧត្តម លោក លោកស្រី ជ្រាបថា មានការកើនឡើងច្រើន នៅឆ្នាំ២០២៤កន្លងមកនេះ។ អ្វីដែលខ្ញុំចាំ គ្រាន់តែនៅក្នុងខេត្តព្រះសី ហនុមួយ យើងមានរហូតដល់គម្រោងជាង ២០០គ្រោង ហើយ ទុន វិនិយោគមានជាង៦ពាន់លានដុល្លារនៅឆ្នាំ២០២៤កន្លងមក«។

ឯកឧត្តម បន្ថែមថា៖ «បច្ចុប្បន្ននេះ រាជរដ្ឋាភិបាលក៏កំពុងបន្តនូវការយកចិត្តទុកដាក់ជំរុញការវិនិយោគខេត្តព្រះសីហនុនបន្តទៀត ដាក់ចេញនូវកម្មវិធីជំរុញការវិនិយោគនេះ ហើយយើងសង្ឃឹមថា នឹងមានការវិនិយោគកើនឡើង។ ជារួម នៅក្នុងឆ្នាំ ២០២៥-២០២៦ ខាងមុខនេះ រាជរដ្ឋាភិបាលក៏នឹងដាក់ចេញនូវកម្មវិធីពិសេស សម្រាប់ជំរុញការវិនិយោគទូទាំងប្រទេសតែម្តង មានន័យថានឹងផ្តល់នូវការលើកទឹកចិត្តបន្ថែមទៀត ទៅអ្វីដែលមាននៅក្នុងអ្វីដែលមាននៅក្នុងច្បាប់វិនិយោគសម្រាប់កិច្ចការវិនិយោគនេះ ហើយយើងសង្ឃឹមថានៅក្នុងឆ្នាំ២០២៥-២០២៦ នឹងមានការវិនិយោគកើនឡើងច្រើន»។

កម្មវិធីពិសេសជំរុញការវិនិយោគក្នុងខេត្តព្រះសីហនុ ឆ្នាំ ២០២៤ នឹងផ្តល់នូវអត្ថប្រយោជន៍ពិសេស ៣ ទៅអ្នកវិនិយោគ ដើម្បីគាំទ្រ និងជំរុញលើកទឹកចិត្តបន្ថែម ក្នុងការទាក់ទាញការវិនិយោគ និងការអភិវឌ្ឍឧស្សាហ កម្ម នៅក្នុងខេត្តព្រះសីហនុ រួមមាន ៖ ទី១.គម្រោងវិនិយោគពាក់ព័ន្ធនឹងអគារជាប់គាំង ទី២. គម្រោងវិនិយោគដែលមិនជាប់ពាក់ព័ន្ធនឹងអគារជាប់គាំង នឹង ទី៣. ការពង្រីកគម្រោងវិនិយោគ និងធុរកិច្ច។

លោក អ៊ឹម សេងហួ ប្រធានសាខាក្រុមហ៊ុនអចលនទ្រព្យ Century 21 Zillion Holding ប្រចាំខេត្តព្រះសីហនុ បានគាំទ្រចំពោះគំនិតផ្តួចផ្តើមរបស់រាជរដ្ឋាភិបាលក្នុងការពង្រីកវិសាលភាពកម្មវិធីពិសេសជំរុញការវិនិយោគនៅទូទាំងប្រទេស។ លោកគាំទ្រ ក៏ព្រោះតែកម្មវិធីពិសេសជំរុញការវិនិយោគដែលកំពុងអនុវត្តន៍ក្នុងខេត្តព្រះសីហនុបានធ្វើឱ្យ សកម្មភាពវិនិយោគពាក់ព័ន្ធនឹងអគារជាប់គាំងរស់រវើកឡើងវិញ។

លោក អ៊ឹម សេងហួ មានប្រសាសន៍ថា ៖ «ពាក់ព័ន្ធនឹងអគារជាប់គាំងជាង ១ពាន់អគារ កាលពីប៉ុន្មានឆ្នាំមុននោះ ឥឡូវចាប់តាំងអនុវត្តន៍កម្មវិធីពិសេសជំរុញការវិនិយោគប្រមាណ ១ឆ្នាំកន្លងមកនេះ ទទួលបានលទ្ធផលល្អប្រសើរ គ្រាន់តែតម្រូវការរបស់អតិថិជនតែលើអគារស្នាក់នៅសម្រាប់បុគ្គលិន និងសណ្ឋាគារ ស្នាក់នៅសម្រាប់ជនជាតិចិន ម៉ាឡេស៊ី។ ប្រសិនបើ កម្មវិធីពិសេសជំរុញការវិនិយោគពង្រីកទៅតាមបណ្តាខេត្តផ្សេងៗទៀត ខ្ញុំគិតថា វាល្អ ព្រោះជាគោលនយោបាយមួយល្អក្នុងការលើកទឹកចិត្តដល់ម្ចាស់គម្រោង និងអ្នកវិនិយោគ»។

លោកបន្ថែមទៀតថា ក្រុងប៉ោយប៉ែត ខេត្តបន្ទាបមានជ័យ ក្រុងបាវិត ខេត្តស្វាយរៀង និងខេត្តសៀមរាប គឺសុទ្ធសឹងជាប៉ូលសេដ្ឋកិច្ចសំខាន់ៗ ប្រសិនបើរាជរដ្ឋាភិបាលពង្រីកកម្មពិធីពិសេសជំរុញការវិនិយោគ តំបន់ទាំងនោះនឹងមានសកម្មភាពវិនិយោគលើវិស័យសំណង់និងអចលនទ្រព្យឱ្យរស់រវើកឡើង ពិសេសគម្រោងដែលកំពុងជាប់គាំង។

លោកនិយាយថា ៖«ខ្ញុំចង់បានន័យថា ប្រសិនបើ រាជរដ្ឋាភិបាលគាត់យកគោលការដែលគាត់អនុវត្តន៍ក្នុងខេត្តព្រះសីហនុ គាត់យកទៅអនុវត្តន៍ទៅគ្រប់ទីកន្លែង ខ្ញុំគិតថា ល្អ ហើយ ជាសញ្ញាវិជ្ជាមានមួយសម្រាប់អ្នកវិនិយោគបរទេស នៅពេលដែលយើងជារដ្ឋាភិបាលជួយជ្រោមជ្រែងគាត់ អីចឹងគាត់អាចយកដំណឹងនេះទៅប្រាប់ដៃគូពាណិជ្ជកម្ម ដៃគូសហការរកស៊ីរបស់គាត់ជាច្រើនឱ្យមកវិនិយោគនៅស្រុកយើង នៅពេលដែលយើងបានការលើកទឹកចិត្តបន្ថែមទៀត»។

គិតត្រឹមខែកុម្ភៈ ឆ្នាំ២០២៥ ក្រុមការងារជំរុញការវិនិយោគក្នុងខេត្តព្រះសីហនុ បានសម្រេចជាគោលការណ៍ផ្តល់ការលើកទឹកចិត្តដល់គម្រោងចំនួន ២៦៩ គម្រោង ដែលមានទុនវិនិយោគប៉ាន់ស្មានសរុប ៦,៦៦៩ លានដុល្លារអាមេរិក ។ ក្រុមការងារនឹងបំពេញភារកិច្ចស្នូលសំខាន់ ២ រួមមាន៖ ទី១. បន្តតាមដាន ត្រួតពិនិត្យ និង ជំរុញការអនុវត្តគម្រោងទាំង ២៦៩ គម្រោង និង ទី២. ធ្វើការសម្របសម្រួលការផ្តល់ការលើកទឹកចិត្តជាក់ស្តែង, និង ដោះស្រាយបញ្ហាប្រឈម និង សំណូមពររបស់ម្ចាស់ គម្រោង ។នេះបើតាម ឯកឧត្តមបណ្ឌិតសភាចារ្យ ហ៊ាន សាហ៊ីប។