ភ្នំពេញ៖ លោកស្រី ឃួន វិច្ឆិកា មន្ត្រីនាំពាក្យក្រសួងអប់រំ យុវជន និងកីឡា បានប្រាប់ដល់ក្រុមអ្នកសារពត៌មាន នៅថ្ងៃទី២៧ ខែកុម្ភៈ ឆ្នាំ២០២៥នេះថា ក្រសួងអប់រំលុបចោលតែកម្មវិធីសិក្សាទំនើប ដែលកំពុងដាក់ឱ្យអនុវត្តនៅកម្រិតបឋមសិក្សាប៉ុណ្ណោះ ចំណែកសាលារៀនជំនាន់ថ្មី ដែលមានចំនួន១៣សាលាគឺរក្សាទុកដូចដើម។ លោកស្រីអ្នកនាំពាក្យបញ្ជាក់យ៉ាងដូច្នេះ ខណៈមានការយល់ច្រំអំពីសាលាទំនើប និងសាលារៀនជំនាន់ថ្មី។ បន្ទាប់ពីសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានប្រកាសលុបចោល នូវកម្មវិធីសិក្សាទំនើប ដែលបង្កើតឡើងក្រោមភាពជាដៃគូរវាងរដ្ឋ និងឯកជនកាលពីម្សិលមិញនោះ។ នៅព្រឹកថ្ងៃទី២៧ ខែកុម្ភៈ ឆ្នាំ២០២៥នេះ លោកស្រី ឃួន វិច្ឆិកា មន្ត្រីនាំពាក្យក្រសួងអប់រំ យុវ ជន និងកីឡា បានឱ្យដឹងពីយន្តការនៃការដោះស្រាយបញ្ហាខាងលើថា ក្រសួងនឹងបញ្ឈប់ការពង្រីកកម្មវិធីសិក្សាទំនើប នៅតាមសាលារៀនផ្សេងទៀត ចាប់ពីពេលនេះតទៅ។ ចំពោះសាលារៀនចំនួន១០ ដែលចាប់ផ្ដើមបានរយៈពេល២ខែហើយនោះ ក្រសួងអនុញ្ញាតឱ្យដំណើរការរហូតដល់ដំណាច់ឆ្នាំសិក្សា២០២៤-២០២៥។ លោកស្រី ឃួន វិច្ឆិកា បន្តថា បន្ទាប់ពីនោះក្រសួងអប់រំ យុវជន និងកីឡា នឹងរៀបចំធ្វើសមាហរណកម្មជាមួយកម្មវិធីជាតិ អាចក្នុងកម្មវិធីសាលារៀនគំរូដែលមានបន្ថែមម៉ោង។ ចំណែកសាលារៀនចំនួន៨ ដែលបានដំណើរការមួយរយៈ ក្រសួងនឹងពិភាក្សាជាមួយក្រុមហ៊ុន ដើម្បីរៀបចំការចាកចេញ (Phase Out) ដោយរួមទាំងការបន្ថយរយៈពេលដែលបានឯកភាពគ្នាក្រៅផ្លូវការ (មិនឆ្លងក្រសួងអប់រំ យុវជន និងកីឡា) មកត្រឹមរយៈពេលណាមួយដែលក្រសួងអប់រំអាចទទួលបន្តគាំទ្រ។ ជាមួយគ្នានេះ ដើម្បីកុំឱ្យមានការភ័ន្តច្រឡំអំពីកម្មវិធីសិក្សាទំនើប និងសាលារៀនជំនាន់ថ្មី លោកស្រីអ្នកនាំពាក្យក្រសួងអប់រំពន្យល់ថា កម្មវិធីទំនើបជាកម្មវិធីក្រៅម៉ោងសិក្សា ដែលកំពុងអនុវត្តនៅក្នុងកម្រិតបឋមសិក្សា ផ្ដោតទៅលើភាសាបរទេស ការប្រើប្រាស់ប្រព័ន្ធ ICT ប្រព័ន្ធបច្ចេកវិទ្យា និងការសរសេរកូដ ដែលកម្មវិធីនេះរៀបចំឡើង ដើម្បីជំរុញបន្ថែមនូវការសិក្សាក្នុងស.វទី២១ ក្រៅម៉ោងសិក្សារបស់សិស្ស ដែលមានការចូលរួមពីឪពុកម្ដាយ និងអាណាព្យាបាលរបស់សិស្ស។ ដោយឡែក សាលារៀនជំនាន់ថ្មី ដែលបច្ចុប្បន្នមានចំនួន១៣សាលា ជាសាលារៀនដែលមានឯករាជ្យភាព ក្នុងការអនុវត្តកម្មវិធីសិក្សាដោយខ្លួនឯង ប្រើប្រាស់ប្រព័ន្ធ ICT ក្នុងការរៀន និងបង្រៀន ប្រើប្រាស់កម្មវិធីស្ទែម (STEM) និងយុទ្ធសាស្ត្របង្រៀនថ្មីៗ។ សាលាជំនាន់ថ្មីបង្កើតឡើង ដើម្បីជំរុញឱ្យសិស្សបឋមនិងធម្យមសិក្សាទទួលបានការសិក្សាស.វទី២១។ គួរបញ្ជាក់ជូនដែរថា កាលពីម្សិលមិញនៅក្នុងពិធីបិទសន្និបាតបូកសរុបការងារអប់រំ យុវជន និងកីឡា ឆ្នាំសិក្សា២០២៣-២០២៤ និងទិសដៅឆ្នាំសិក្សា២០២៤-២០២៥ ក្រោមប្រធានបទ "អភិវឌ្ឍមូលធនមនុស្សឆ្ពោះទៅសម្រេចចក្ខុវិស័យកម្ពុជា ឆ្នាំ២០៥០" សម្ដេចមហាបរវធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានប្រកាសលុបចោលនូវកម្មវិធីសិក្សាទំនើប ដែលជាភាពជាដៃគូរវាងរដ្ឋនិងឯកជន ព្រោះសម្ដេចមិនចង់ឱ្យមានស្តង់ដា២ក្នុងសាលាតែមួយ។ រីឯសាលារៀនជំនាន់ថ្មី និងសាលាសមធម៌ សម្ដេចធិបតីនាយករដ្ឋមន្ត្រី ឱ្យរក្សាបន្តដដែល៕