សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជាបានអញ្ជើញជាអធិបតីក្នុងពិធីបិទសន្និបាតបូកសរុបលទ្ធផលការងារអប់រំ យុវជន និងកីឡា ឆ្នាំសិក្សា ២០២៣-២០២៤ និងទិសដៅឆ្នាំសិក្សា ២០២៤-២០២៥ នៅរសៀលថ្ងៃពុធ ទី២៦ ខែកុម្ភៈ ឆ្នាំ២០២៥នេះ។ សន្និបាតអប់រំ យុវជន និងកីឡាឆ្នាំនេះ បានដំណើរការចាប់ពីថ្ងៃទី២៤ ដល់ថ្ងៃទី២៦ ខែ កុម្ភៈ ឆ្នាំ២០២៥ ដើម្បីបូកសរុបវាយតម្លៃការងារ ដែលបានអនុវត្តក្នុងឆ្នាំសិក្សាកន្លងមក និង លើកទិសដៅការងារសម្រាប់ឆ្នាំសិក្សាខាងមុខទៀត។ បើតាមឯកឧត្តម ហង់ជួន ណារ៉ុន ឧបនាយករដ្ឋមន្រ្តី រដ្ឋមន្រ្តីក្រសួងអប់រំ យុវជន និងកីឡា បានថ្លែងថា " មុននឹងមានសន្និបាតនៅថ្នាក់ជាតិនេះ ក្រសួងបានណែនាំមន្ទីរ អប់រំ យុវជន និងកីឡារាជធានីខេត្តទាំងអស់ ឱ្យរៀបចំរបាយការណ៍សន្និបាត ដើម្បីប្រមូលធាតុ ចូលពីថ្នាក់ក្រោមជាតិ មកពិភាក្សាដោះស្រាយក្នុងសន្និបាតនៅថ្នាក់ជាតិ ដែលមានអ្នកចូលរួម ផ្ទាល់ប្រមាណ ២០០០នាក់ និងមានអ្នកចូលរួមជាច្រើនទៀតតាមប្រព័ន្ធអនឡាញ"។ ឯកឧត្តម ឧបនាយករដ្ឋមន្រ្តី រដ្ឋមន្រ្តីក្រសួងអប់រំ យុវជន និងកីឡា បានបញ្ជាក់ថា "ក្រសួងបានជ្រើសរើសប្រធានបទ បទបង្ហាញ និងបទអន្តរាគមន៍ ដែលមានខ្លឹមសារជា យុទ្ធសាស្ត្រ ស្របទៅនឹងវិធានការគន្លឹះទាំង៤ ដែលជាអនុសាសន៍ដ៏ថ្លៃថ្លារបស់ សម្តេចធិបតី នាយករដ្ឋមន្ត្រី ដើម្បីពង្រឹងគុណភាពអប់រំ និងស្របទៅនឹងការអនុវត្តស្តង់ដាសាលារៀនគំរូ ដែលជាគោលនយោបាយកម្រិតសាលារៀន"។ ឯកឧត្តម ឧបនាយករដ្ឋមន្រ្តី រដ្ឋមន្រ្តីក្រសួងអប់រំ យុវជន និងកីឡា ថ្លែងថា "សមិទ្ធផល នៃការស្តារឡើងវិញនៃវិស័យអប់រំ ក្នុងរយៈពេលជាច្រើនទសវត្សកន្លងទៅនេះ ជាពិសេស ការសម្រេចចិត្តជាយុទ្ធសាស្ត្ររបស់ សម្តេចតេជោ អតីតនាយករដ្ឋមន្ត្រី ក្នុង ការបង្កើនថវិកាសម្រាប់វិស័យអប់រំ និងការអភិវឌ្ឍហេដ្ឋារចនាសម្ព័ន្ធនៃគ្រឹះស្ថានសិក្សា បានធ្វើ ឱ្យកម្ពុជាសម្រេចបាននូវសមិទ្ធផលដ៏ល្អខាងផ្នែកលើកកម្ពស់អក្ខរកម្ម ថ្វីត្បិតតែកម្ពុជាត្រូវ ការរៀបចំរបាយការណ៍ទូទាត់កសាងប្រព័ន្ធអប់រំកម្ពុជាឡើងវិញ ពីចំណុចសូន្យចាប់តាំងពីជាង ៤០ឆ្នាំមុន បន្ទាប់ពីរបបប្រល័យពូជសាសន៍ បានបញ្ចប់ និងចាប់តាំងពីកម្ពុជាសម្រេចបានសុខ សន្តិភាពចាប់តាំងពី ២០ឆ្នាំមុននេះ"។ ឯកឧត្តម ឧបនាយករដ្ឋមន្រ្តី រដ្ឋមន្រ្តីក្រសួងអប់រំ យុវជន និងកីឡា បានបន្តថា "ការអភិវឌ្ឍវិស័យអប់រំ គឺជាការងាររួមរបស់រាជរដ្ឋាភិបាលទាំងមូល ទាំងនៅថ្នាក់ជាតិ និង ទាំងនៅថ្នាក់ក្រោមជាតិ ក្រោមការដឹកនាំប្រកបដោយគតិបណ្ឌិតរបស់ សម្តេចធិបតី នាយករដ្ឋមន្ត្រី និងដោយមានការចូលរួមពីគ្រប់ភាគីពាក់ព័ន្ធទាំងអស់ ជាពិសេសបុគ្គលិក អប់រំគ្រប់លំដាប់ថ្នាក់ អាជ្ញាធរមូលដ្ឋាន ក្រុមការងារថ្នាក់ជាតិចុះជួយមូលដ្ឋាន មាតាបិតា អ្នកអាណាព្យាបាល សិស្សានុសិស្ស និងដៃគូអភិវឌ្ឍផងដែរ"៕