សម្តេចកិត្តិសង្គហបណ្ឌិត ម៉ែន សំអន ឧត្តមប្រឹក្សាផ្ទាល់ព្រះមហាក្សត្រ និងជាប្រធានសមាគមនារីកម្ពុជា ដើម្បីសន្តិភាព និងអភិវឌ្ឍន៍ បានអញ្ជើញជាអធិបតីដ៏ខ្ពង់ខ្ពស់ក្នុងពិធីប្រកាសកែសម្រួលនិងបំពេញបន្ថែមសមាសភាពគណៈកម្មការសាខាសមាគមនារីកម្ពុជា ដើម្បីសន្តិភាពនិងអភិវឌ្ឍន៍ ខេត្តត្បូងឃ្មុំ និងការបើកកិច្ចប្រជុំបូកសរុបលទ្ធផលការងារឆ្នាំ២០២៤ និងលើកទិសដៅឆ្នាំ២០២៥ របស់សមាគម ផងដែរ។

ពិធីនេះបានប្រារព្ឋធ្វើឡើង នៅរសៀល ថ្ងៃអាទិត្យទី២៣ ខែកុម្ភៈ ឆ្នាំ២០២៥ ក្នុងសាលាខេត្តត្បូងឃ្មុំ មានការអញ្ជើញចូលរួមពីសំណាក់ថ្នាក់ដឹកនាំខេត្ត សមាជិកសមាជិកាសមាគមប្រមាណ ៤៥០នាក់។

ឯកឧត្តម ប៉ែន កុសល្យ អភិបាលខេត្តត្បូងឃ្មុំ បានថ្លែងអំណរគុណជ្រាលជ្រៅជូនសម្តេចកិត្តិសង្គហបណ្ឌិត ម៉ែន សំអន ដែលបានចំណាយពេលវេលាដ៏មមាញឹកអញ្ជើញជាអធិបតីដ៏ខ្ពង់ខ្ពស់ក្នុងពិធីនេះ។

ឯកឧត្តមអភិបាលខេត្តបានមានប្រសាសន៏ លើកឡើងថា ក្រោមការដឹកនាំប្រកបដោយគតិបណ្ឌិតរបស់ សម្តេចមហាបវធិបតី ហ៊ុន ម៉ាណែត រាជរដ្ឋាភិបាលកម្ពុជា បានបន្តនិងជំរុញបន្ថែមការ លើកកម្ពស់គុណតម្លៃស្ត្រី តាមរយៈការពង្រឹងសមត្ថភាពស្ត្រីឲ្យក្លាយជាអ្នកដឹកនាំ តាមក្រសួង ស្ថាប័នរបស់ជាតិ ក៏ដូចនៅក្នុងវិស័យឯកជនលើគ្រប់វិស័យ នៅថ្នាក់ជាតិនិងក្រោមជាតិ ទាំងវិស័យនយោបាយ វិស័យសេដ្ឋកិច្ច និងវិស័យសង្គមកិច្ចជាដើម សំដៅធានានិងឆ្លើយតបទៅនឹងសាកលភាវូបនីយកម្ម ទាំងក្នុងក្របខណ្ឌតំបន់ និងពិភពលោក។

មានប្រសាសន៏នៅក្នុងពិធីនេះ សម្តេចកិត្តិសង្គហបណ្ឌិត ម៉ែន សំអន បានពាំនាំការផ្តាំផ្ញើសាកសួរសុខទុក្ខ និងការនឹករលឹកពីសំណាក់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកិត្តិយសសមាគមនារីកម្ពុជា ដើម្បីសន្តិភាព និងអភិវឌ្ឍន៍ និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ជូនដល់សមាជិកសមាជិកា ទាំងអស់ដែលបានអញ្ជើញចូលរួមកម្មវិធី នាឱកាសនោះ ផងដែរ។

សម្តេចកិត្តិសង្គហបណ្ឌិត ម៉ែន សំអន បានចូលរួមអបអរសាទរជូនចំពោះ លោកជំទាវ ហេង សំអាន ដែលត្រូវបាន។

សម្តេចកិត្តិសង្គហបណ្ឌិត បានមានប្រសាសន៏លើកឡើងពីប្រវត្តិ បេសកកម្មក៏ដូចជាចក្ខុវិស័យសមាគមនារីកម្ពុជាដើម្បីសន្តិភាព និងអភិវឌ្ឍន៍ ដែលបានបង្កើតឡើងដើម្បីចូលរួម រំដោះជាតិមាតុភូមិ និងបានធ្វើសកម្មភាពជួយសង្គម និងមនុស្សធម៌ជាបន្តបន្ទាប់ជារហូតមកដល់សម័យសន្តិភាព បច្ចុប្បន្ននេះ ។ សម្តេចកិត្តិសង្គហបណ្ឌិត ក៏បានលើកឡើងនូវគំរូវីរភាព របស់ថ្នាក់ដឹកនាំដែលបានលះបង់ កម្លាំងកាយចិត្ត ប្រាជ្ញា ស្មារតី ក្នុងការស្វែងរកបាននូវសុខសន្តិភាព និងការអភិវឌ្ឍជូនប្រទេសជាតិ រហូតមកដល់សព្វថ្ងៃនេះ។

សម្តេចបានផ្តាំផ្ញើដល់ថ្នាក់ដឹកនាំ សមាជិក គណៈកម្មការសាខាសមាគមនារីខេត្ត ដែលបានប្រកាសថ្ងៃនេះ ត្រូវបន្តការខិតខំ ប្រឹងប្រែងគ្រប់សកម្មភាព ដូចជាពង្រឹងរបៀបរបបធ្វើការ របបរាយការណ៍ ការបែងចែកតួនាទីភារកិច្ច និងទទួលខុសត្រូវទៅថ្នាក់ដឹកនាំ នៃគណៈកម្មការសមាគមនារីសាខា អនុសាខា ទូទាំងអង្គភាពកាន់តែទូលំទូលាយ និងឱ្យបានស៊ីជម្រៅទៅតាមគោលនយោបាយរបស់ប្រមុខរាជរដ្ឋាភិបាលកម្ពុជា ដែល បានទទួលស្គាល់ថា «ស្ត្រីគឺជាឆ្អឹងខ្នងដ៏រឹងមាំនៃសេដ្ឋកិច្ច និងសង្គមជាតិរបស់យើងទាំងអស់គ្នា»៕