ភ្នំពេញ៖ លោកអធិការរងខណ្ឌ៧មករា​ បានបើករថយន្តធ្លាក់ទៅក្រោមស្ពាន​ បណ្តាលឱ្យរងការខូចខាត​ និងស្លាប់ម្នាក់ របួសធ្ងន់ស្រាល​ ៤នាក់ កាលពីវេលាម៉ោង ១១:៥០នាទីយប់ ថ្ងៃទី២០ ខែកុម្ពៈ ឆ្នាំ២០២៥​ ស្ថិតនៅលើកំណាត់ផ្លូវជាតិលេខ២ សង្កាត់ព្រែកកំពឹស ខណ្ឌដង្កោ រាជធានីភ្នំពេញ។ យោងតាមប្រភពព័ត៌មានពីប្រជាពលរដ្ឋដែលនៅក្បែរទីតាំងកើតហេតុ​ បានឲ្យដឹងថា​ រថយន្តរងគ្រោះខាងលើ បានបើកបរតាមបណ្តោយផ្លូវជាតិលេខ២ ទិសដៅពីកើតទៅលិច ក្នុងល្បឿនលឿន លុះដល់ចំណុចកើតហេតុ ត្រង់ស្ពានបាក់ ក៏ស្រាប់តែបើកធ្លាក់ផ្លូវទៅខាងស្តាំដៃ បណ្តាលឲ្យក្រឡាប់រថយន្តទៅក្រោមស្ពានតែម្តង។ នៅក្នុងហេតុការណ៍គ្រោះថ្នាក់ខាងលើ ក្មេងស្រីវ័យប្រមាណជិត​ ១០ឆ្នាំម្នាក់​ ត្រូវបានស្លាប់ បន្ទាប់ពីខ្ទាតចេញពីរថយន្ត ខណៈមនុស្សប្រុសស្រី៤នាក់ទៀតរងរបួសធ្ងន់ស្រាល ត្រូវបានបញ្ជូនទៅមន្ទីរពេទ្យសង្គ្រោះបន្ទាន់។ សូមបញ្ជាក់ថា​ រថយន្កមានម៉ាក Lexus RX 330 ពណ៌ទឹកប្រាក់ ពាក់ស្លាកលេខ ភ្នំពេញ 2AU-8503 មានមនុស្សរួមដំណើរ ប្រុសស្រីចំនួន​ ៥នាក់។ ក្រោយកើតហេតុសមត្ថកិច្ចមូលដ្ឋាន បានទាក់ទងទៅកាន់សមត្ថកិច្ចជំនាញចរាចរណ៍ ដើម្បីចុះធ្វើការវាស់វែង និងយករថយន្តខាងលើទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ រង់ចាំដោះស្រាយតាមនីតិវិធីច្បាប់ នៅពេលក្រោយ។​ ចំណែកសពរបស់ក្មេងស្រីរងគ្រោះ​ ត្រូវបានប្រគល់ជូនក្រុមគ្រួសា៕