អ្នកសារព័ត៌មាន ប្រមាណ២០ស្ថាប័ន និង៥ភាសា បន្តធ្វើបេសកកម្មផ្សព្វផ្សាយព័ត៌មានទ្រង់ទ្រាយធំ ពីឧស្សាហកម្មរ៉ែ និង កសិឧស្សាហកម្មទេសចរណ៍ នៅ ខេត្តមណ្ឌលគិរី និងខេត្តក្រចេះ.. ព្រឹកថ្ងៃទី១៣ ខែកុម្ភៈ ឆ្នាំ២០២៥ ក្លិបអ្នកកាសែតកម្ពុជា ដឹកនាំដោយ លោក ពុយ គា ប្រធានក្លិបអ្នកកាសែតកម្ពុជា បានរៀបចំបេសកកម្មដើម្បីផ្សព្វផ្សាយព័ត៌មានទ្រង់ទ្រាយធំពីឧស្សាហកម្មរ៉ែ និងកសិឧស្សាហកម្មទេសចរណ៍នៅ ខេត្តមណ្ឌលគិរី និងខេត្តក្រចេះ។ នេះជាបេសកកម្មលើកទី៧ របស់ ក.អ.ក បន្ទាប់ពីបេសកកម្មដ៏មានសារសំខាន់បែបនេះត្រូវបានធ្វើ ឡើងជាបន្តបន្ទាប់ទៅតាមខេត្តនានា រួមមានខេត្តព្រះសីហនុ កែប សៀមរាប ខេត្តពោធិ៍សាត់ និងរមណីយដ្ឋាន ឋានសួគ៌បូកគោ។ បើតាមលោក ពុយ គា ប្រធានក្លិបអ្នកកាសែតកម្ពុជា. «បេសកកម្មលើកនេះហាក់ប្លែកបន្តិចពី បេសកកម្មកន្លងមកដោយយើងបានផ្តោតទៅលើវិស័យឧស្សាហកម្មរ៉ែ និងកសិឧស្សាហកម្មទេសចរណ៍ដែលជា វិស័យដ៏មានសក្តានុពលក្នុងខេត្តមណ្ឌលគិរី និងខេត្តក្រចេះ ខណៈការផ្សព្វផ្សាយពីសក្តានុពលនៃខេត្តភូមិ ភាគឦសានទាំងពីរនេះហាក់ដូចជាមិនទាន់ទូលំទូលាយនៅឡើយ»៕