តើក្រុមណាជាជើងឯក ដណ្ដើមពានរង្វាន់កីឡាបាល់ទះឯកឧត្តមសន្ដិបណ្ឌិត នេត សាវឿន ឆ្នាំ២០២៥? (ភ្នំពេញ)៖ ឯកឧត្ដម សន្តិបណ្ឌិត នេត សាវឿន បានរៀបចំការប្រកួតពានរង្វាន់បាល់ទះ ក្រោមប្រធានបទអបអរសារទរទិវាជ័យជម្នះលើរបបប្រល័យពូជសាសន៍ ៧មករា ដែលការប្រកួតធ្វើឡើងចាប់ពីថ្ងៃទី២ ដល់ថ្ងៃទី៥ ខែមករា ឆ្នាំ២០២៥ នៅពហុកីឡដ្ឋានជាតិអូឡាំពិក ស្ថិតក្នុងសាលបាល់ទះ រាជធានីភ្នំពេញ។ ការប្រកួតពានរង្វាន់កីឡាបាល់ទះឯកឧត្តមសន្ដិបណ្ឌិត នេត សាវឿន ឆ្នាំ២០២៥ មានការចូលរួមប្រកួតពីសមាគម-ក្លិប-ក្រុមនារីចំនួន ៨ក្រុម និងបុរសចំនួន ៤ក្រុម។ ក្រោយធ្វើការប្រកួតដ៏ស្វិតស្វាញរយៈពេល ៤ថ្ងៃកន្លងមក ពេលនេះបានរកឃើញក្រុមជើងឯកចំនួន ២ក្រុម គឺ ក្រុមបាល់ទះជើងឯកបុរសបានលើក្រុមមកពីក្លឹបវិសាខា ដែលទទួលជ័យជម្នះលើក្រុមក្រសួងមហាផ្ទៃ ក្នុងលទ្ធផល ៣ ទល់នឹង ២ នៃវគ្គផ្ដាច់ព្រ័ត្រ។ ចំណែកក្រុមជើងឯកផ្នែកនារីបានទៅក្រុមកីឡាការិនីមមកពីខេត្តពោធិ៍សាត់ ដែលប្រកួតឈ្នះក្រុមបាល់ទះខេត្តកណ្ដាលក្នុងលទ្ធផល ៣ទល់នឹង ១ កាលពីម្សិលមិញនេះ។ ខាងក្រោមនេះ ជាលទ្ធផល បិទបញ្ចប់ការប្រកួតវិញ្ញាសាបុរសដោយ៖ - សមាគមកីឡាបាល់ទះវិសាខា ទទួលបានជ័យលាភីលេខ១ - សមាគមកីឡាបាល់ទះក្រសួងមហាផ្ទៃទទួលបានជ័យលាភីលេខ២ - ក្លិបស្នងការន.បរាជធានីភ្នំពេញទទួលបានជ័យលាភីលេខ៣។ ដោយឡែក លទ្ធផល បិទបញ្ចប់ការប្រកួតវិញ្ញាសានារីវិញ៖ - ក្លឹបបាល់ទះមន្ទីរអបរំយុវជនខេត្តពោធិ៍សាត់ ទទួលបានជ័យលាភីលេខ១ - ក្លឹបបាល់ទះមន្ទីរអបរំយុវជនខេត្តកណ្ដាល ទទួលបានជ័យលាភីលេខ២ - ក្លឹបបាល់ទះមន្ទីរអបរំយុវជនរាជធានីភ្នំពេញ ទទួលបានជ័យលាភីលេខ៣។ សូមជម្រាបថា ពិធីបិទការប្រកួតពានរង្វាន់កីឡាបាល់ទះឯកឧត្តមសន្ដិបណ្ឌិត នេត សាវឿន ឆ្នាំ២០២៥ បានធ្វើឡើងដើម្បីអបអរសាទរទិវាជ័យជម្នះលើរបបប្រល័យពូជសាសន៍ ៧មករា ១៩៧៩-២០២៥ ក្រោមអធិបតីភាពដ៏ខ្ពង់ខ្ពស់ ឯកឧត្តមសន្ដិបណ្ឌិត នេត សាវឿន ឧបនាយករដ្ឋមន្រ្តី និងជាប្រធានកិត្តិយសសហព័ន្ធកីឡាបាល់ទះកម្ពុជា៕