លោក LIANG Songshou ប្រធានសហព័ន្ធសិក្សាស្រាវជ្រាវសេដ្ឋកិច្ច ឧស្សាហកម្មតំបន់ឆ្នេរក្វាងទុង- ហុងកុង-ម៉ាកាវ បានថ្លែងបែបនេះ ក្នុងពេលដែលរូបលោម និងសហការី ជួបសន្ទនាការងារ ជាមួយ ឯកឧត្តម លីម ឡោកពិសិដ្ឋ រដ្ឋលេខា ធិការក្រសួងពាណិជ្ជកម្ម កាលពីថ្ងៃទី១៧ធ្នូ ម្សិលមិញនេះ នៅទីស្តីក្រសួងពាណិជ្ជកម្ម។ ឯកឧត្តម រដ្ឋលេខាធិការ លឹម ឡោកពិសិដ្ឋ បានសម្ដែងនូវការស្វាគមន៍ និងសាទរ ចំពោះបហរតិភូ ដែលមកស្វែងយល់ អំពីកាលានុវត្តន៍ភាព និងបរិយាកាសធុរកិច្ច និងវិនិយោគនៅកម្ពុជា។ ឯកឧត្តមរដ្ឋលេខាធិការ ក៏បានជម្រាបជូនអំពីគោលនយោបាយ និងយុទ្ធសាស្រ្តសំខាន់ៗដែលបានដាក់ចេញដោយរាជរដ្ឋាភិបាលកម្ពុជា ជាពិសេសមានក្រសួងពាណិជ្ជកម្មជាសេនាធិការ ក្នុងការធ្វើឱ្យប្រសើរឡើងនូវការធ្វើពាណិជ្ជកម្ម និងការទាក់ទាញការវិនិយោគបន្ថែមទៀតពីគ្រប់មជ្ឈដ្ឋាន។ ជាមួយគ្នានេះ ឯកឧត្តមរដ្ឋលេខាធិការ ក៏បានលើកឡើងអំពីចំណងមិត្តភាពដ៏ស្អិតរមួត និងយូរអង្វែងរវាងកម្ពុជា-ចិន, ការបង្កើតកិច្ចព្រមព្រៀងពាណិជ្ជកម្មសេរីទ្វេភាគីកម្ពុជា-ចិន និងកិច្ចសហប្រតិបត្តិការផ្សេងៗទៀតទាំងក្នុងតំបន់ និងសកលលោក។ បើតាមលោក LIANG Songshou កម្ពុជា គឺជាប្រទេសមួយ ដែលមានសក្តានុពល សម្រាប់ ពាណិជ្ជកម្ម និងវិនិយោគ ហើយ លោក ពិតជាមានកាចាប់អារម្មណ៍យ៉ាងខ្លាំង ក្នុងការមកវិនិយោគ នៅកម្ពុជា ជាពិសេសលើវិស័យថាមពលជីវម៉ាសនិងអប់រំ ព្រមទាំងចង់ចូលរួមជាមួយរដ្ឋាភិបាលក្នុងការវិយោគលើវិស័យការពារបរិស្ថាន ផងដែរ៕