ខេត្តតាកែវ៖ នាព្រឹកថ្ងៃសៅរ៍ ទី១៦ ខែឧសភា ឆ្នាំ២០២៦ ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា (ក.អ.ក.) និងជាអនុប្រធានអចិន្ត្រៃយ៍ គណៈកម្មាធិការពិសេស ដើម្បីជំរុញការរៀបចំ និងការអនុវត្តគម្រោងព្រែកជីកហ្វូណនតេជោ បានអញ្ជើញចុះពិនិត្យវឌ្ឍនភាពការសាងសង់គម្រោងគ្រប់គ្រងធនធានទឹកចម្រុះហ្វូណនតេជោ កំណាត់ទី២ ដែលស្ថិតនៅក្នុងភូមិសាស្ត្រខេត្តតាកែវ ។ នៅក្នុងបេសកកម្មចុះពិនិត្យផ្ទាល់នេះ ក៏មានការអមដំណើរដោយ ឯកឧត្តម ប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ជូន និងជាប្រធានលេខាធិការដ្ឋាន គណៈកម្មាធិការពិសេស រួមជាមួយអភិបាលនៃគណៈអភិបាលខេត្តតាកែវ ឯកឧត្តម លោកជំទាវ ថ្នាក់ដឹកនាំក្រសួង-ស្ថាប័នពាក់ព័ន្ធ ក្រុមហ៊ុនសាងសង់ និងមន្រ្តីជំនាញពាក់ព័ន្ធជាច្រើនរូបទៀត ។ គួរបញ្ជាក់ថា ទីតាំងដែលគណៈប្រតិភូចុះពិនិត្យនាឱកាសនេះ ស្ថិតនៅភូមិត្រើយឃ្លោក ឃុំដូងខ្ពស់ ស្រុកបូរីជលសារ ខេត្តតាកែវ ដើម្បីពិនិត្យមើលវឌ្ឍនភាពការងារជាក់ស្តែងនៃការសាងសង់ក្នុងកំណាត់ទី២ នៃគម្រោងព្រែកជីកជាប្រវត្តិសាស្ត្រមួយនេះ ។