អង្គការសុខភាពពិភពលោក (WHO) បានរកឃើញវីរុសកូវីដ-១៩ បំប្លែងថ្មីមួយប្រភេទដែលមានឈ្មោះថា Cicada នៅក្នុងប្រទេសមួយចំនួនដូចជា សហរដ្ឋអាម៉េរិក ជប៉ុន កេនយ៉ា ហូឡង់ និងអង់គ្លេស។ បច្ចុប្បន្ន WHO បានចាត់ទុកវ៉ារ្យ៉ង់ថ្មីនេះស្ថិតក្នុងបញ្ជីការតាមដាន (Variants of Monitoring) ប៉ុន្តែមិនទាន់មានភស្តុតាងណាមួយបង្ហាញថា វាមានការរីករាលដាលខ្លាំង ឬបង្កឱ្យមានសភាពធ្ងន់ធ្ងរគួរឱ្យកត់សម្គាល់នៅឡើយទេ។ ពាក់ព័ន្ធនឹងករណីនេះ នាយកដ្ឋានប្រយុទ្ធនឹងជំងឺឆ្លង (CDC) នៃក្រសួងសុខាភិបាលកម្ពុជា បានបញ្ជាក់នៅព្រឹកថ្ងៃទី៣០ ខែមីនានេះថា កម្ពុជាមិនទាន់រកឃើញការឆ្លងមេរោគបំប្លែងថ្មី Cicada នេះនៅឡើយទេ។ ទោះជាយ៉ាងណា ក្រុមជំនាញកំពុងតាមដានយ៉ាងសកម្មចំពោះការវិវត្តនៃមេរោគថ្មីនេះ ដើម្បីការពារសុខុមាលភាពសាធារណៈ។ គួររំលឹកផងដែរថា ចាប់តាំងពីកម្ពុជាបានរកឃើញករណីវិជ្ជមានដំបូងបង្អស់នៅថ្ងៃទី២៧ ខែមីនា ឆ្នាំ២០២០ មកដល់បច្ចុប្បន្ន កម្ពុជាមានករណីឆ្លងសរុបជិត ១៤ម៉ឺនករណី និងមានអ្នកស្លាប់ចំនួន ៣ ០៥៦នាក់។ អាជ្ញាធរសុខាភិបាលនៅតែបន្តអំពាវនាវឱ្យប្រជាពលរដ្ឋមានការប្រុងប្រយ័ត្នខ្ពស់ជានិច្ច។