កម្លាំងជំនាញអាវុធហត្ថរាជធានីភ្នំពេញ កាលពីថ្ងៃទី៩ ខែមករា ឆ្នាំ២០២៦ បានចុះបង្ក្រាបទីតាំងលក់បារីអេឡិចត្រូនិក (Vape) មួយកន្លែង នៅភូមិ១០ សង្កាត់បឹងកក់ទី២ ខណ្ឌទួលគោក រាជធានីភ្នំពេញ និងរឹបអូសឧបករណ៍អេឡិចត្រូនិកសម្រាប់ជក់សារធាតុគីមីខុសច្បាប់ ចំនួនជាង ២ ០០០ គ្រឿង។ បើតាមលោក រ័ត្ន ស្រ៊ាង មេបញ្ជាការកងរាជអាវុធហត្ថរាជធានីភ្នំពេញ បានសរសេរបញ្ជាក់លើទំព័រហ្វេសប៊ុក ថា ប្រតិបត្តិការនេះ សមត្ថកិច្ចចុះបង្ក្រាប និងរកឃើញ បារី អេឡិចត្រូនិក (ម៉ាស៊ីន) ចំនួន ៧៦៩ដើម និងក្បាលជក់ ១ ៩៣០គ្រឿង។ បើតាមលោក រ័ត្ន ស្រ៊ាង កម្លាំងអាវុធហត្ថបានឃាត់ខ្លួនម្ចាស់ទីតាំង២នាក់ និងបញ្ជូនទៅបញ្ជាការដ្ឋាន កងរាជអាវុធហត្ថ រាជធានីភ្នំពេញ ដើម្បីអនុវត្តនីតិវិធីតាមច្បាប់។ បើតាមក្រសួងសុខាភិបាល បារីអឡិកត្រូនិកបង្កផលប៉ះពាល់លើសុខភាពដោយសារសារធាតុនីកូទីន។ នីកូទីន មានសារធាតុញៀនខ្លាំងប៉ះពាល់ខួរក្បាល បាត់បង់ដល់ការគ្រប់គ្រងអារម្មណ៍និងគ្រោះថ្នាក់ចំពោះស្រី្តមានផ្ទៃពោះ។