ឯកឧត្តម កែ ប៊ុនខៀង រដ្ឋលេខាធិការក្រសួងអប់រំ យុវជន និងកីឡា និងជាប្រធានសហព័ន្ធកីឡាសិស្ស និស្សិតកម្ពុជា និងឯកឧត្តម ប៉ុន សុខ អគ្គនាយក នៃអគ្គនាយកដ្ឋានកីឡា និងជាអគ្គលេខាធិការសហព័ន្ធកីឡាសិស្ស និស្សិតកម្ពុជា ឯកឧត្តម ព្រំ ប៊ុណ្ណយី ទីប្រឹក្សាក្រសួងអប់រំ យុវជន និងកីឡា ជានាយបេសកកម្មបានដឹកនាំប្រតិភូកីឡាកម្ពុជាសរុបចំនួន២៨នាក់ ចូលរួមកម្មវិធីបើកផ្លូវការនៃការប្រកួតកីឡាសិស្សអាស៊ានលើកទី១៤ ស្ថិតក្រោមអធិបតីភាពលោកជំទាវបណ្ឌិត Datin Seri Setia Dr. Hajah Romaizah Md Salleh រដ្ឋមន្ត្រីក្រសួងអប់រំនៃប្រទេសព្រុយណេ កាលពីថ្ងៃទី២០ ខែវិច្ឆិកា ឆ្នាំ២០២៥។ មុនពិធីបើកជាផ្លូវការ មន្រ្តីជាន់ខ្ពស់ នៃក្រសួងអប់រំ យុវជន និងកីឡាកម្ពុជា បានអញ្ជើញចូលរួមក្នុងកិច្ចប្រជុំគណៈកម្មការបច្ចេកទេសលើកទី៧៦ និងកិច្ចប្រជុំគណៈកម្មការគ្រប់គ្រងក្រុមប្រឹក្សាកីឡាសិស្សអាស៊ានលើកទី៥៨ (The 58th ASSC Management Committee Meeting) ដែលមានវត្តមានអញ្ជើញចូលរួមពីថ្នាក់ដឹកនាំក្រុមប្រឹក្សាកីឡាសិស្សអាស៊ាន និងថ្នាក់ដឹកនាំតំណាងប្រទេសក្នុងតំបន់អាស៊ាន។ ជាលទ្ធផលពីកិច្ចប្រជុំដ៏ពិសេសនោះរួមមាន, ការធ្វើបច្ចុប្បន្នភាពព័ត៌មានទូទៅនៃការប្រកួតកីឡាសិស្សអាស៊ានលើកទី១៤ នៅប្រទេសប្រ៊ុយណេដារូស្សាឡាម, ការអនុម័តស្មារតីកិច្ចប្រជុំគណៈកម្មការគ្រប់គ្រងក្រុមប្រឹក្សាកីឡាសិស្សអាស៊ានលើកទី៥៧ នៅប្រទេសវៀតណាមឆ្នាំ២០២៤ នាពេលកន្លងទៅ, ការទទួលធ្វើជាម្ចាស់ផ្ទះការប្រកួតកីឡាសិស្សអាស៊ានលើកទី១៥ ឆ្នាំ២០២៦នៅប្រទេសឥណ្ឌូនេស៊ី លើកទី១៦ ឆ្នាំ២០២៧នៅប្រទេសថៃ និងលើកទី១៧ ឆ្នាំ២០២៨ នៅប្រទេសម៉ាឡេស៊ី។   គួរបញ្ជាក់ផងដែរថាៈការប្រកួតកីឡាសិស្សអាស៊ានលើកទី១៤ ឆ្នាំ២០២៥នេះ ប្រព្រឹត្តិទៅចាបពីថ្ងៃទី២០-២៩ ខែវិច្ឆិកា ឆ្នាំ២០២៥ ដែលមានថ្នាក់ដឹកនាំ ប្រតិភូ កីឡាចំនួន១០ប្រទេសចូលរួម ហើយមានកីឡាករ កីឡាការិនីសរុបចំនួន ១០៥៥នាក់៕