ឧត្តមក្រុមប្រឹក្សានៃអង្គចៅក្រម នាថ្ងៃទី១៧ ខែវិច្ឆិកា នេះ បានបើកកិច្ចប្រជុំលើកទី៣៩ ដែលប្រព្រឹត្តទៅក្នុងព្រះបរមរាជវាំង ក្រោមព្រះរាជាធិបតីភាពរបស់ព្រះករុណាព្រះបាទសម្ដេច ព្រះបរមនាថ នរោត្តម សីហមុនី ព្រះមហាក្សត្រនៃកម្ពុជា និងជាព្រះ ប្រធានឧត្តមក្រុមប្រឹក្សានៃអង្គចៅក្រម។ តាមសេចក្ដីប្រកាសព័ត៌មានរបស់អគ្គលេខាធិការដ្ឋាននៃឧត្តមក្រុមប្រឹក្សានៃអង្គចៅក្រមបានឲ្យដឹងថា កិច្ចប្រជុំនោះ បានសម្រេចដាក់ទណ្ឌកម្មវិន័យដល់ចៅក្រមចំនួន២២រូប និងព្រះ រាជអាជ្ញា-ព្រះរាជអាជ្ញារងចំនួន៥រូប។ ហើយចៅក្រមទាំង២២ ដែលត្រូវបានរងការដាក់ទណ្ឌកម្មខាងវិន័យថ្នាក់ទី១ គឺមានចំនួន៣រូប ត្រូវស្ដីបន្ទោសដោយផ្ទាល់មាត់ ចំនួន៩រូប ត្រូវស្តីបន្ទោសដោយចុះក្នុងសំណុំលិខិតផ្ទាល់ខ្លួន និងដាក់វិន័យក្រោមរូបភាពផ្អាកមិនឱ្យចុះឈ្មោះក្នុងតារាងដំឡើងថ្នាក់ ឬឋានន្តរស័ក្តិ ក្នុងរយៈពេល២ឆ្នាំ មានចំនួនម្នាក់។ ចំណែកចៅក្រមចំនួន៩រូបផ្សេងទៀត ត្រូវបានឧត្តមក្រុមប្រឹក្សានៃអង្គចៅក្រម សម្រេចដាក់ទណ្ឌវិន័យថ្នាក់ទី២ ក្រោមរូបភាពផ្លាស់ដោយបង្ខំមានចំនួន៣រូប ការផ្លាស់ដោយបង្ខំ តម្រូវឱ្យទទួលការបណ្តុះបណ្តាលបន្ថែមមានចំនួនម្នាក់ និងការបន្ថយមួយថ្នាក់ នៃឋានន្តរស័ក្តិ មានចំនួន៥រូប។ ដោយឡែក ព្រះរាជអាជ្ញារងចំនួន៣រូប ត្រូវបានដាក់ទណ្ឌកម្មខាងវិន័យដូចគ្នានេះ ពោលគឺការស្តីបន្ទោសដោយផ្ទាល់មាត់ មានចំនួនម្នាក់ ផ្អាកមិនឱ្យចុះឈ្មោះក្នុងតារាងដំឡើងថ្នាក់ ឬឋានន្តរស័ក្តិ ក្នុងរយៈពេល២ឆ្នាំ ម្នាក់ និងព្រះរាជអាជ្ញារងម្នាក់ទៀតត្រូវផ្លាស់ដោយបង្ខំ តម្រូវឱ្យទទួលការបណ្តុះ បណ្តាលបន្ថែម និងបន្ថយមួយថ្នាក់ នៃឋានន្តរស័ក្តិ។ តាមសេចក្ដីប្រកាសព័ត៌មានរបស់អគ្គលេខាធិការដ្ឋាននៃឧត្តមក្រុមប្រឹក្សានៃអង្គចៅក្រម ក៏មានព្រះរាជអាជ្ញាចំនួន២រូប ត្រូវបានដាក់វិន័យផងដែរ ក្នុងនោះព្រះរាជអាជ្ញាមួយរូបត្រូវបានសម្រេចបណ្ដេញចេញពីក្របខណ្ឌព្រះរាជអាជ្ញា ខណៈព្រះរាជអាជ្ញារង១រូបទៀតត្រូវបានព្យួរពីការងារដោយមិនឱ្យមានបៀវត្សក្នុងរយៈពេល១ឆ្នាំ៕