រដ្ឋមន្ត្រីក្រសួងការពារជាតិថៃព្រមានថាបើកិច្ចប្រជុំ JBC មិនទទួលបានជោគជ័យដូចអ្វីដែលថៃចង់បាននោះទេ នាយករដ្ឋមន្ត្រីថៃនឹងមិនចុះហត្ថលេខាលើសន្ធិសញ្ញាសន្តិភាពទេដែលមានលោកដូណាល់ត្រាំជាម្ចាស់ហត្ថលេខីនោះទេ។ នេះបើយោងតាមការចេញផ្សាយដោយកាសែតថៃខោស៊ត។ បើតាមខាវសុត ការព្រមាន របស់លោក Nattapol Nakphanit រដ្ឋមន្ត្រីក្រសួងការពារជាតិថៃបែបនេះ កំឡុងពេលកិច្ចប្រជុំ JBC កំពុងដំណើរ នៅព្រឹកនេះ នៅខេត្តត្រាត ដែលថៃធ្វើជាម្ចាស់ផ្ទះ។ លោក Nattapol Nakphanit បានព្រមានទៀតថា ថៃនឹងមិនបើកកិច្ចប្រជុំដែលខ្ជះខ្ជាយ ខាតពេលវេលាទៀតនោះទេ អ្វីដែលកើតឡើង ឲ្យវាកើតឡើងទៅចុះ។ គួរកត់សម្គាល់ថាកិច្ចប្រជុំចង្អៀតកម្រិតរដ្ឋមន្ត្រីគណៈកម្មាធិការ កិច្ចការព្រំដែន ដែលជាកិច្ចប្រជុំពិភាក្សាមុនកិច្ចប្រជុំពិសេសគណៈកម្មការចម្រុះ បានចាប់ផ្តើមដំណើរនៅទឹកដីថៃ នាថ្ងៃនេះ។ កិច្ចប្រជុំពិសេសគណៈកម្មការចម្រុះ គណៈប្រតិភូកម្ពុជា ដឹកនាំដោយឯកឧត្ដម ឡាំ ជា រដ្ឋមន្រ្តីទទួលបន្ទុករដ្ឋលេខាធិការដ្ឋានកិច្ចការព្រំដែន និងជាប្រធានគណៈកម្មការចម្រុះព្រំដែនកម្ពុជា-ថៃ ដោយមានសមាសភាពអន្តរក្រសួង និងបណ្តាខេត្តជាប់ព្រំដែនកម្ពុជា-ថៃ ចូលរួម។ ចំណែកសមាសភាពថៃ ដឹកនាំដោយឯកឧត្តម Prasas Prasasvinitchai ទីប្រឹក្សាក្រសួងការបរទេស និងជាប្រធានគណៈកម្មការចម្រុះព្រំដែនថៃ-កម្ពុជា និងដោយមានការចូលរួមពីតំណាងប្រតិភូអមដទៃទៀត។