ឯកឧត្តម ម៉ុល វិបុល អនុរដ្ឋលេខា​ធិការ​ក្រសួង​ការងារ និងបណ្ដុះបណ្ដាលវិជ្ជាជីវៈ បានដឹកនាំ​ ក្រុមការងារ​សម្រប​សម្រួល​ផ្គូរផ្គងទីផ្សារការងារជូនពលករ នៅក្នុងក្រុមហ៊ុន សឹង ឡុង ជាន (អេសអិលជេ) អឺភែរឹល (ខេមបូឌា) ស្ថិត​

នៅ​សង្កាត់ពងទឹក ខណ្ឌដង្កោ រាជធានីភ្នំពេញ ដើម្បី​សម្រប​សម្រួល និងតាមដាន​ការទទួល​យកបង​ប្អូនពល​ករខ្មែរ​ដែលទើបវិលត្រឡប់មកពីប្រទេសថៃ។

ឯកឧត្តម ម៉ុល វិបុល បានមាន​ប្រសា​សន៍ថា ក្រុមហ៊ុន សឹង ឡុង ជាន (អេសអិលជេ) អឺភែរឹល (ខេមបូឌា) មានតម្រូវការកម្លាំងពលកម្មបន្ថែមចំនួន ៧០០ នាក់(ស្រី៦៥០នាក់) ទៅតាមផ្នែក និង​ជំនាញ​ដូចជា ផ្នែកកាត់ដេរ និងផ្នែកត្រួតពិនិត្យ QC។ លើស​ពី​នេះ ទោះកម្មករអត់​មានជំនាញក៏​រោងចក្រមាន​តម្រូវ​ការ​ជ្រើសរើសផងដែរ។

ឯកឧត្តម បានពន្យល់​ណែនាំ ដល់​ក្រុមហ៊ុន ឱ្យ​ទទួលយកបងប្អូនពលករខ្មែរដែលទើបត្រឡប់មកពីប្រទេសថៃ

ដែលខ្វះអត្តសញ្ញាណបណ្ណឱ្យសម្ភាសន៍ចូលធ្វើការ និងសន្យាសហការជាមួយនឹងក្រុមការងារមន្ទីរ ក៏ដូចជា ទីភ្នាក់ងារជាតិមុខរបរ និងការងារ (NEA) ធ្វើការរួម​គ្នាឱ្យ​មានភាពស្អិតរមួត ដើម្បីពន្លឿនប្រសិទ្ធ​ភាពការសម្ភាស​ការ​ងារតាមអនឡាញ និងទទួលយក​បងប្អូនកម្មករ​និយោ​ជិត​ឱ្យចូលធ្វើការ៕