បណ្ឌិត សុខ ទូច ប្រាប់ឱ្យថៃរៀនពីប្រវត្តិសាស្រ្ត ហ៊ានទៅICJ និងកុំបង្កើតទំនាស់ជាមួយអ្នកដទៃដើម្បីដោះស្រាយបញ្ហាផ្ទៃក្នុង

 សង្គម
 ០៥ កក្កដា ២០២៥
 60

បណ្ឌិត សុខ ទូច ប្រធានរាជបណ្ឌិត្យសភាកម្ពុជា នៅល្ងាចថ្ងៃទី០៤ ខែកក្កដា នេះ ប្រាប់ទៅកាន់ភាគីថៃឱ្យ បង្កើត

ទំនាក់ទំនងល្អជាមួយអ្នកជិតខាង សិក្សាពីប្រវត្តិសាស្ត្ររបស់ខ្លួនឡើងវិញ ស្វែងយល់ថាការប្រើកម្លាំងយោធាមិនអាចបញ្ចប់សង្គ្រាមបានឡើយ ថៃត្រូវហា៊នទៅដោះស្រាយបញ្ហានៅតុលាការយុត្តិធម៌អន្តរជាតិ និងមិនត្រូវបង្កើតទំនាស់ជាមួយប្រទេសជិតខាងដើម្បីដោះស្រាយវិបត្តិផ្ទៃក្នុងឡើយ។ លោក សុខ ទូច សរសេរដូច្នេះនៅលើទំព័រហ្វេសប៊ុកផ្លូវការភ្ជាប់ជាមួយរូបថតចុះជួបកងទ័ពកម្ពុជា។

លោកបណ្ឌិត សុខ ទូច សរសេរលើនៅលើទំព័រហ្វេសប៊ុកផ្លូវនាល្ងាចថ្ងៃទី០៤ ខែកក្កដា ដូច្នេះ៖«ថ្ងៃទី២៨ ខែឧសភា ឆ្នាំ២០២៥ កងទ័ពថៃបានបាញ់ប្រហារទៅលើកងទ័ពការពារព្រំដែនរបស់កម្ពុជាដែលស្ថិតនៅតំបន់មុំបី នៅម៉ោង ៥:៤៥នាទីព្រឹក បណ្ដាលឱ្យកងទ័ពកម្ពុជាម្នាក់បានពលីជីវិត។ សូមថៃចងចាំថា៖១. សូមថៃគិតគូរពីអ្នកជិតខាងឱ្យបានល្អ។


២. សូមថៃសិក្សាអំពីប្រវត្តិសាស្ត្ររបស់ខ្លួន។ ៣. សូមថៃពិនិត្យមើលឡើងវិញថា តើមានដំណោះស្រាយលើបញ្ហាណាមួយដែលប្រើប្រាស់កម្លាំង ហើយបញ្ចប់សង្គ្រាមបាននាពេលបច្ចុប្បន្ននេះ? ៤. បើថៃចិត្តមោះមុត សូមបង្ហាញភាពក្លាហាន កាន់ដៃគ្នាជាមួយកម្ពុជា ទៅកាន់តុលាការយុត្តិធម៌អន្តរជាតិ (ICJ) បើទោះបីជាថៃបានប្រកាសដើរចេញពី ICJ ក៏ដោយ ប្រសិនបើថៃយល់ថា ប្រាសាទតាមាន់តូច ប្រាសាទតាមាន់ធំ និងប្រាសាទតាក្របី ជារបស់អ្នកដោយស្របច្បាប់។ ៥. សូមដោះស្រាយបញ្ហាផ្ទៃក្នុងរបស់អ្នក កុំប្រើប្រាស់យុទ្ធសាស្ត្រទំនាស់ជាមួយប្រទេសជិតខាង ធ្វើជាកាតាលីករ ដើម្បីដោះស្រាយទំនាស់ផ្ទៃក្នុងរបស់ខ្លួន។»៕

អត្ថបទដោយ៖ cambodia-nation-media