«ឃើញរូបថតនេះពិតជាធ្វើឲ្យនឹកស្រណោះគ្រាដែលលំបាកក្នុងកាលៈទេសៈប្រទេសមានសន្តិភាពផងមានសង្រ្គាមផង»។ សម្តេចតេជោ ហ៊ុន សែន សម្តែងអារម្មណ៍នឹកនាអតីតកាលតាមរយៈរូបថតមួយសន្លឹកដែលបានបង្ហោះដោយឯកឧត្តម ខៀវ កញ្ញារីទ្ធ នាថ្ងៃទី២២ ឧសភានេះ។ សំណេររបស់ឯកឧត្តម ខៀវ កញ្ញារីទ្ធ សរសេរថា៖«អរគុណ លោកជំទាវ ដួង វណ្ណា ដែលបានបង្ហោះរូបនេះចែកគ្នា។ មិនមានរូបខ្ញុំក្នុងនេះទេ តែស្រណោះយុទ្ធមិត្តយើងច្រើនណាស់ដែលបានចាកចេញទៅ»។ សំណេរខ្លីអមដោយរូបភាពអតីកាលមួយសន្លឹកនាសម័យប្រជុំទី៩ នីតិកាលទី១ នៃរដ្ឋសភា បានដាស់អារម្មណ៍សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា បានចូលបញ្ចេញមតិភ្លាមៗ។ សំណេរតាមរយៈការបញ្ចេញមតិរបស់ សម្តេចតេជោ បានបន្ថែមថា៖«ពួកយើងសាមគ្គីគ្នាបានល្អណាស់សម្តេចហេង សំរិន ជាប្រធានក្រុមប្រឹក្សារដ្ឋ(ប្រមុខរដ្ឋ) សម្តេច ជា ស៊ីម ជាប្រធានរដ្ឋសភា ឯខ្លួនខ្ញុំជាប្រធានក្រុមប្រឹក្សារដ្ឋមន្ត្រី(នាយករដ្ឋមន្ត្រី)រួមជាមួយសមាជិកសភា សមាជិករដ្ឋាភិបាលកងកម្លាំងប្រដាប់អាវុធ មន្ត្រីរដ្ឋការនាពេលនោះប្រឹងងើបឈរឡើងទើបមានថ្ងៃនេះ។ ទោះបងៗមួយចំនួនបានលាយើងទៅមុនតែពួកយើងនៅតែនឹកអាល័យដល់ពួកគាត់ជានិច្ច»។ សម្តេចតេជោ ហ៊ុន សែន នៅតែនឹកនាអតីតកាលដែលធ្លាប់បានតស៊ូ រំដោះប្រទេសដើម្បីឆ្ពោះទៅរកភាពសុខសាន្តជូនប្រជាពលរដ្ឋកម្ពុជា ដល់សព្វថ្ងៃនេះ។   បច្ចុប្បន្នក្រោមដំបូលសន្តិភាព ដឹកនាំដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា ប្រជាពលរដ្ឋកម្ពុជា រស់នៅប្រកបដោយសុខសាន្ត ផ្លូវស្ពានច្រើនខ្វាត់ខ្វែង អភិវឌ្ឍគ្រប់ទិសទីក្នុងដែនកម្ពុជរដ្ឋ។