ឯកឧត្តម ប៊ុន ហ៊ាន រដ្ឋលេខាធិការក្រសួងធនធានទឹក និងឧតុនិយម កោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់មន្រ្តីបច្ចេកទេស នៃនាយកដ្ឋានវិស្វកម្ម និងមន្រ្តីនៃមន្ទីរធនធានទឹក និងឧតុនយមខេត្តស្វាយរៀង និងខេត្តត្បូងឃ្មុំ បន្ទាប់ពីអញ្ជើញចុះត្រួតពិនិត្យដោយផ្ទាល់នូវវឌ្ឍនភាពការងារដែលសម្រេចបាន។ ជាមួយគ្នានោះដែរក្នុងនាម ឯកឧត្តម ប៊ុន ហ៊ាន តំណាងដ៏ខ្ពង់ខ្ពស់​ឯកឧត្តម​ ថោ ជេដ្ឋា​ រដ្ឋមន្ត្រី​ក្រសួង​ធនធានទឹក និង​ឧតុនិយម បានលើកទឹកចិត្តដល់ក្រុមការងារអនុវត្តគម្រោង ជាពិសេសក្រុមការងារបច្ចេកទេសឱ្យបន្តយកចិត្តទុកដាក់​ពង្រឹងលើគុណភាព សោភ័ណភាព ឱ្យបាន​ត្រឹមត្រូវតាមលក្ខណៈបច្ចេកទេស និងបានណែនាំដល់សហគមន៍កសិករប្រើប្រាស់ទឹក​ ចូលរួមថែរក្សាប្រព័ន្ធនេះឱ្យមាននិរន្តរភាព សម្រាប់ការងារស្រោចស្រព និងការប្រើប្រាស់ប្រចាំថ្ងៃជូនប្រជាពលរដ្ឋបានយូរអង្វែង។ ក្រោមកិច្ចសហការ​យ៉ាងជិតស្និទ្ធ​ពី​លោកអនុប្រធាននាយកដ្ឋាន និងមន្ត្រីបច្ចេកទេសរបស់នាយកដ្ឋានវិស្វកម្ម និងប្រធានមន្ទីរធនធានទឹក និង​ឧតុនិយម​ខេត្តស្វាយរៀង​ និង​ខេត្តត្បូងឃ្មុំ​ ​អញ្ជើញ​ចុះពិនិត្យជាក់ស្តែង​វឌ្ឍនភាពគម្រោង​ស្តារជួសជុលទំនប់សណ្ដអាងទឹក​គៀនតាស៊ីវ(ជំហាន៣)ស្ថិតក្នុងឃុំស្វាយយា​ ស្រុកស្វាយជ្រុំ ខេត្តស្វាយរៀង ដែលសម្រេចបានប្រមាណ​ ៧០%​​ និងគម្រោងជួសជុលទំនប់អាងបឹងធំ ស្ថិតក្នុងឃុំរកាខ្នុរ​ ស្រុកក្រូចឆ្មា ខេត្តត្បូងឃ្មុំ​ ដែលសម្រេចបានប្រមាណ ៧០%​។ សូមជម្រាបថា​ ការងារសំខាន់ៗនៃគម្រោង​ជួសជុល​ទំនប់​អាងទឹកទាំងពីរ​មានដូចជា​៖ ទី​១)​គម្រោងជួសជុលទំនប់សណ្តអាងទឹកគៀនតាស៊ីវ(ជំហាន៣) ការងារអនុវត្ត​រួមមាន៖ ជួសជុលទំនប់សណ្តអាងទឹកចំនួន​ ២ខ្សែ ប្រវែង ៣៨២០មែត្រ និងសាងសង់សំណង់សិល្បការ្យសរុបចំនួន ៤កន្លែង និង​ ទី២)​គម្រោងជួសជុលទំនប់អាងទឹកបឹងធំ ការងារអនុវត្តរួមមាន៖​ ជួសជុលទំនប់អាងទឹកចំនួន​ ១ខ្សែប្រវែង ៤៨៣០ម៉ែត្រ និងជួសជុលសំណង់ទ្វារទឹកដែលមានស្រាប់ចំនួន ៣កន្លែង៕