កីឡាករប្រដាល់សកលជម្រើសជាតិកម្ពុជា ០៣រូបប្តេជ្ញាចិត្តខ្ពស់ក្នុងការប្រជែងយកមេដាយជូនជាតិកម្ពុជា នាការប្រកួតកីឡាយុវជនអាស៊ីអាយុក្រោម ២២ឆ្នាំ នៅប្រទេសស្រីលង្កា ដែលចាប់ផ្តើមពីថ្ងៃទី១០ ដល់ទី២៤ ខែឧសភា ឆ្នាំ២០២៥ នៅប្រទេសស្រីលង្កា។ ជាមួយគ្នានោះអ្នកទាំងបីរូបក៏មានក្តីបារម្ភសម្រាប់ការចេញទៅចូលរួមក្នុងព្រឹត្តិការណ៍អន្តរជាតិលើកដំបូររបស់ខ្លួនផងដែរ។ មុនចេញដំណើរទៅចូលរួមការប្រកួតកីឡាប្រដាល់សកលកម្រិតអាស៊ី កីឡាករជម្រើសជាតិប្រដាល់សកលកម្ពុជា ឡុង ណូវ៉ែល ប្តេជ្ញាយ៉ាងមុតមាំថា រូបគេនឹងខិតខំប្រឹងប្រែងប្រជែងយកមេដាយជូនជាតិឱ្យបាន ដ្បិតការប្រកួតនៅក្រៅស្រុកជាលើកដំបូងរបស់ខ្លួនក៏ដោយ។ «សម្រាប់ការត្រៀមខ្លួនរបស់ខ្ញុំគឺបានរួចរាល់ ៧០ ទៅ៨០ភាគរយ ការហ្វឹកហាត់បានពេញល្អ ទាំងព្រឹក និងល្ងាច និងការលោតអន្ទាក់ដើម្បីយកហ្ស៊ូស។ សម្រាប់ការចេញទៅប្រកួតលើកទី១របស់ខ្ញុំ នឹងប្តេជ្ញាប្រឹងប្រែងឱ្យអស់ពីសមត្ថភាព»។ នេះជាការលើកឡើងរបស់​កីឡាករ ណូវ៉ែល ដែលត្រូវវាយលើប្រភេទទម្ងន់ ៥១គីឡូក្រាម។ ចំណែកកីឡាករជើងថ្មីនៃជម្រុំជម្រើសជាតិប្រដាល់សកលកម្ពុជា រ៉ុន វីរៈ បង្ហាញអារម្មណ៍ដូចគ្នាដែរថា រូបគេគឺបានប្តេជ្ញាយ៉ាងពេញទំហឹងក្នុងការដណ្តើមយកមេដាយជូនជាតិ បើទោះបីជាការចេញប្រឡូកលើកដំបូងក៏ពិតមែន។ វីរៈ និយាយថា៖«ខ្ញុំបានត្រៀមខ្លួនរយចរាល់ហើយក្នុងការចេញទៅប្រកួតដើម្បីដណ្តើមយកមេដាយជូនជាតិមាតុភូមិ។ ខ្ញុំក៏មានក្តីបារម្ភផងដែរព្រោះនេះជាការចេញប្រកួតក្រៅស្រុកលើកដំបូង»។ រីកីឡាករប្រដាល់សកលអាជីព នា សុវណ្ណ បានលើកឡើងស្រដៀងគ្នាដែរថា ការចេញទៅចូលរួមប្រកួតកម្រិតយុវជនអាស៊ី អាយុក្រោម២២ឆ្នាំ​ នៅស្រីលង្កានេះ រូបគេបានប្តេជ្ញាយ៉ាងមុតគត់ហើយថា នឹងអាចឈ្នះមេដាយក្នុងកម្រិតណាមួយ តែក៏មានក្តីបារម្ភចំពោះប្រភេទទម្ងន់របស់គេ។ សុវណ្ណ និយាយថា៖«ខ្ញុំត្រៀមខ្លួនបាន ៨០ភាគរយហើយ។ ខ្ញុំទុកចិត្តលើខ្លួនឯងបើទោះបីជាខ្ញុំបានធ្វើគីឡូអស់ក៏ពិតមែន»។ បេសកម្មនេះទាំង ណូវ៉ែល វីរៈ និងសុវណ្ណ រំពឹងថានឹងមានការគាំទ្រពីពុកម៉ែបងប្អូនប្រជាពលរដ្ឋកម្ពុជា ពិសេសគឺការផ្តល់កម្លាំងចិត្ត លើកទឹកចិត្ត ជូនពរសម្រាប់ពួកគេទាំង០៣រូប។ សូមបញ្ជាក់ថា ណូវ៉ែល គេវាយលើប្រភេទទម្ងន់៥១គីឡូក្រាម, វីរៈ វាយលើប្រភេទទម្ងន់៦០គីឡូក្រាម និងសុវណ្ណ វាយលើប្រភេទទម្ងន់ ៤៨គីឡូក្រាម៕