តាមរយៈសំណេរនៅលើផេកហ្វេសប៊ុកផ្លូវការ ឯកឧត្តម វ៉ាង វិនពីន (Wang Wenbin) ឯកអគ្គរដ្ឋទូតវិសាមញ្ញ និងពេញសមត្ថភាព នៃ​សាធារណ​​រដ្ឋ​ប្រជាមានិតចិន ប្រចាំនៅព្រះរាជាណាចក្រកម្ពុជា បានសរសេរថា ប្រទេសចិន និង​ប្រទេស​កម្ពុជា គឺ​ជាមិត្តដែកថែបដែលស្គាល់ចិត្ត ស្គាល់ថ្លើមគ្នា ហើយក៏ជាដៃគូជួយអភិវឌ្ឍរួមគ្នា។ នៅដើមឃ្លាដំបូង នៃសំណេររបស់ ឯកឧត្ដម ឯកអគ្គរដ្ឋទូតចិន ក៏បានលើកឡើងពីភាពស៊ីគ្នាចំពោះ សុភាសិតចិន និងសុភាសិតខ្មែរមួយឃ្លា ដោយសុភាសិតចិនគេនិយាយថា៖«ព្រួញ​មួយ​ងាយ​បំបែក ប៉ុន្តែព្រួញដប់ពិបាកបំបែក»។ ចំណែកសុភាសិតខ្មែរ​ពោល​ថា​៖«ចង្កឹះមួយបាច់ កាច់មិនបាក់»។ បន្ថែមពីលើនោះទៀត ឯកអគ្គរាជទូតចិនប្រចាំកម្ពុជា សរសេរបន្ថែមថា ភាគីចិននឹងលើកទឹកចិត្តក្រុមហ៊ុនកាន់តែច្រើនមកដាក់វិនិយោគទុននៅកម្ពុជា ព្រមទាំងបើកទីផ្សារទំហំធំសម្បើមដល់ភាគីកម្ពុជា នាំចូលផលិតផលកសិកម្មគុណភាពល្អកាន់តែច្រើន ដើម្បីចែករំលែកឱកាសអភិវឌ្ឍចិនដល់មិត្តកម្ពុជា។ ភាគីចិនជឿជាក់ថា ក្រោមការស៊ីជម្រៅកិច្ចសហប្រតិបត្តិការចិន-កម្ពុជា នឹងបង្កើនទំនុកចិត្ត ឱ្យកម្ពុជាអាចសម្រេចបំណងអភិវឌ្ឍចំពោះមុខនឹងការបង្ខិតបង្ខំសេដ្ឋកិច្ចខាងក្រៅ៕