ឯកឧត្តម ឌី វិជ្ជា ប្រធានក្លិបបាល់ទាត់ព្រះខ័នរាជស្វាយរៀង បានប្រកាសនៅលើគណនីហ្វេសប៊ុក ផ្លូវការរបស់ខ្លួនអំពីការផ្តល់ជូនសំបុត្រចូលទស្សនា និងកន្សែងសម្រាប់អ្នកសារព័ត៌មានកីឡា ទាំងអស់ ក្នុងថ្ងៃនៃការប្រកួតវគ្គផ្តាច់ព្រ័ត្រពានរង្វាន់បាល់ទាត់ AFC Challenge League 2024/25 រវាងក្រុមបាល់ទាត់ព្រះខ័នរាជស្វាយរៀង របស់កម្ពុជា និងក្រុម FK Arkadag មកពីប្រទេសតួកមម៉េនីស្ថាន ដែលនឹងធ្វើឡើងនាថ្ងៃទី១០ ខែឧសភា ឆ្នាំ២០២៥ នៅពហុកីឡដ្ឋានជាតិមរតតេជោ។ សំណេររបស់ឯកឧត្តម ឌី វិជ្ជា បានសរសេរថា៖«សូមជម្រាបជូនដល់បងប្អូនសារព័ត៌មានកីឡាទាំងអស់ ខ្ញុំនឹងផ្តល់ជូនសំបុត្រទស្សនាការប្រកួតវគ្គផ្តាច់ព្រ័ត្រ AFC Challenge League ក្នុងម្នាក់ចំនួន ០២សំបុត្ររួមទាំងទាំងកន្សែងក្លិបបាល់ទាត់ព្រះខ័នរាជស្វាយរៀង សម្រាប់ចូលរួមទស្សនា និងផ្សព្វផ្សាយពីសកម្មភាពនានាក្នុងការប្រកួតវគ្គផ្តាច់ព្រ័ត្រ»។ សូមបញ្ជាក់ផងដែរថា ព្រះខ័នរាជស្វាយរៀង បានឈានដល់វគ្គផ្តាច់ព្រ័ត្រនេះបន្ទាប់ពីយកឈ្នះក្រុមខ្លាំងមកពីប្រទេសឥណ្ឌូណេស៊ី Madura United FC សរុបលទ្ធផលទាំងពីរជើង ៦-៣។ ក្នុងជើងទី១ ព្រះខ័នរាជស្វាយរៀងឈ្នះ Madura United ក្នុងលទ្ធផល ៣-០ នាការប្រកួតក្នុងពហុកីឡដ្ឋានជាតិមរតកតេជោ និងជើងទី២ ក្រុមទាំងពីររក្សាលទ្ធផលស្មើគ្នា ៣-៣ នាការប្រកួតក្នុងទឹកដី ម៉ាឌូរ៉ា យូណាធីត។ ចំនែកក្រុម FK Arkadag មុនបន្តដំណើរមកដល់វគ្គផ្តាច់ព្រ័ត្រនេះគេបានវាយបកយកឈ្នះក្រុមខ្លាំង AL Arabi សរុបលទ្ធផលទាំងពីរជើង ៣-២។ ក្នុងជើងទី១ FK Arkadag ចាញ់ AL Arabi ក្នុងលទ្ធផល ២-០ និងជើងទី២ គេបានយកឈ្នះវិញក្នុងដីខ្លួនដោយបញ្ចប់លទ្ធផល ៣-០៕