ឯកឧត្តម សន្តិបណ្ឌិត ឧបនាយករដ្ឋមន្ត្រី នេត សាវឿន នាព្រឹកថ្ងៃទី២១ ខែមេសានេះ បានអញ្ចើញអមដំណើរ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ចូលរួមសម្ពោធ ដាក់ឱ្យប្រើប្រាស់ជាផ្លូវការ កំពង់ផែទេសចរណ៍ ខ្នាតអន្តរជាតិខេត្តកំពត ដែលមានតម្លៃជាង១០លានដុល្លារ។ ក្រសួងសាធារណការ និង ដឹកជញ្ជូន បានឲ្យដឹងថា កំពង់ផែទេសចរណ៍ អន្តរជាតិកំពត បានដំណើរការសាងសង់កាលពីថ្ងៃទី០៨ ខែសីហា ឆ្នាំ២០១៨ នៅលើផ្ទៃដី ជាង៤ហិកតា ស្ថិតក្នុងភូមិជុំក្រៀល ឃុំជុំក្រៀល ស្រុកទឹកឈូ ខេត្តកំពត។ សូមជំរាបថា ក្រោយបើកឲ្យដំណើរការ កំពង់ផែទេសចរណ៍អន្តរជាតិខេត្តកំពតនេះ នឹងក្លាយជាច្រកទ្វារ អន្តរជាតិផ្លូវសមុទ្រដ៏សំខាន់ សម្រាប់តភ្ជាប់ប្រព័ន្ធគមនាគមន៍ជាតិ និងជាមេដែកដ៏រឹងមាំក្នុងការស្រូបទាញទេសចរជាតិ អន្តរជាតិ ឆ្ពោះទៅកាន់ខេត្តកំពត។កំពង់ផែទេសចរណ៍ខ្នាតអន្តរជាតិខេត្តកំពតនេះ មានលក្ខណៈអំណោយ ផលល្អ ពីធម្មជាតិ ដែលអាច អនុញ្ញាត ឱ្យនាវាផ្ទុកអ្នកដំណើរ ឬភ្ញៀវទេសចរ រហូតដល់ ៣០០នាក់ ចូល និងចេញ កំពង់ផែនេះ ជាលក្ខណៈអន្តរជាតិបាន៕