បើតាមរយៈបណ្ដាញសង្គមហ្វេសប៊ុកផ្លូវការរបស់ លោក ឃឹម ហ្វីណង់ អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានបញ្ជាក់ថា “កិច្ចសន្យាទិញលក់ម្រេចខ្មៅ” ទំហំ៧០ម៉ឺនដុល្លារមួយទៀត ត្រូវបានចុះហត្ថលេខាជាផ្លូវការរវាងសហគមន៍កសិកម្មទំនើបម្រេចមេមត់ត្បូងឃ្មុំ និងក្រុមហ៊ុនFUCHS Cambodia។ តាមអ្នកនាំពាក្យ សហគមន៍កសិកម្មទំនើបនេះនឹងផ្គត់ផ្គង់ម្រេចខ្មៅចំនួន១០០តោនក្នុងតម្លៃថេរ៧ដុល្លារ/គីឡូក្រាម សម្រាប់ម្រេចស្តង់ដាសុវត្ថិភាព ដែលជាតម្លៃល្អលើសពីតម្លៃមធ្យមនៅលើទីផ្សារប្រមាណ១០ភាគរយ។ គួរជម្រាបថា កាលពីថ្ងៃទី២៦ ខែមីនា សហគមន៍កសិកម្មទំនើបស្វាយចន្ទីចំនួន៣រួមមាន សហគមន៍កសិកម្មទំនើបប្រាសាទសំបូររុងរឿង សហគមន៍កសិកម្មទំនើបសាលាវិស័យកំពង់ធំ និងសហគន៍កសិកម្មទំនើបទំរីងកំពង់ធំ ក៏ទើបចុះហត្ថលេខាលើកិច្ចសន្យាស្តីពី “ការផលិត និងផ្គត់ផ្គង់គ្រាប់ស្វាយចន្ទី” រវាងសហគមន៍កសិកម្មទំនើបទាំង៣រួមគ្នា ជាមួយនឹងក្រុមហ៊ុនMIRARTH នៅក្នុងខេត្តកំពង់ធំ ចំនួន៤០០តោនចន្ទីសើមផងដែរ សរុបជាទឹកប្រាក់ប្រមាណ៦៥ម៉ឺនដុល្លារអាមេរិក។ សហគមន៍នឹងទទួលបានប្រាក់កក់ចំនួន៣០ភាគរយនៃកិច្ចសន្យាទាំងមូល។ ជាមួយគ្នានេះ អ្នកនាំពាក្យក្រសួងកសិកម្ម បានគូសបញ្ជាក់អំពីសារៈសំខាន់នៃការធ្វើផលិតកម្មកសិកម្មតាមកិច្ចសន្យាសម្រាប់សហគមន៍ ពោលសមាជិកទាំងអស់ទទួលបានធានារួចស្រេចទៅហើយចំពោះការព្រួយបារម្ភអំពីទីផ្សារ និងកាត់បន្ថយបាននូវការព្រួយបារម្ភអំពីការធ្លាក់ចុះនៃគ្រាប់ស្វាយចន្ទីនោះទេ។ លោកក៏បានណែនាំឱ្យនាយកដ្ឋានកសិឧស្សាហកម្ម និងសហគមន៍ផ្ទាល់ បន្តចុះកិច្ចសន្យាលក់គ្រាប់ស្វាយចន្ទីបន្ថែមទៀត រហូតដល់ចប់រដូវប្រមូលផល ព្រមទាំងពិចារណាស្តុកទុកក្នុងកម្រិតណាមួយ សម្រាប់ការលក់ជាគ្រាប់ស្ងួតផងដែរ៕